دوحا (ويب ڊيسڪ) قطر جي وزيراعظم شيخ محمد بن عبدالرحمان بن جاسم الثاني دوحا ۾ اسرائيل جي حملي خلاف عرب، اسلامي ۽ دوست ملڪن جي يڪجهتي لاءِ شڪرگذاري جو اظهار ڪندي چيو آهي ته هن حملي جو جواب مضبوط ۽ اثرائتي جواب سان ڏيڻ گهرجي.
قطري وزيراعظم شيخ محمد بن عبدالرحمان، عرب-اسلامي هنگامي اجلاس جي سلسلي ۾ دوحا ۾ پرڏيهي وزيرن جي اجلاس کي خطاب ڪندي چيو ته عرب ۽ اسلامي ملڪن قطر تي اسرائيل جي وحشياڻي حملي جي مذمت ڪئي آهي. هن چيو ته عرب ۽ اسلامي ملڪ قطر سان ان جي خودمختياري جي حفاظت لاءِ تعاون ڪندا.
قطري وزيراعظم چيو ته اسان دوست ملڪن پاران اسرائيلي بربريت ۽ حملي جي يڪجهتي ۽ مذمت جي اظهار لاءِ برادر عرب ۽ اسلامي ۽ بين الاقوامي برادري جا شڪرگذار آهيون. هن چيو ته انهن ملڪن اسان سان مڪمل تعاون جو اظهار ڪيو آهي ۽ اسان جي ملڪ جي خودمختياري لاءِ قانوني قدم کنيا ويندا.
شيخ محمد چيو ته هاڻي وقت اچي ويو آهي ته عالمي برادري ٻٽي معيار کي ڇڏي ڏئي ۽ اسرائيل کي ان جي سڀني ڏوهن جو ذميوار قرار ڏئي. قطري وزيراعظم چيو ته حملي جو جواب ٺوس ۽ اثرائتي انداز ۾ ڏنو وڃي.
