اسلام آباد (ويب ڊيسڪ): نائب وزيراعظم ۽ پرڏيهي وزير اسحاق ڊار وچ اوڀر جي حالتن بابت غير ضروري ڳالهيون رد ڪندي چيو آهي ته آمريڪا ۽ ايران وچ ۾ اڻ سڌيون ڳالهيون جاري آهن، جن ۾ پاڪستان ثالثي جو اهم ڪردار ادا ڪري رهيو آهي.
سماجي رابطن جي پليٽفارم “ايڪس” تي جاري بيان ۾ اسحاق ڊار وضاحت ڪئي ته پاڪستان ٻنهي ڌرين وچ ۾ پيغام پهچائڻ جو ذريعو بڻيو آهي، ۽ هن سلسلي ۾ آمريڪا 15 نڪتا ايران آڏو رکيا آهن، جن تي ايران غور ڪري رهيو آهي.
هن وڌيڪ ٻڌايو ته هن امن عمل کي اڳتي وڌائڻ لاءِ ڀائر اسلامي ملڪ ترڪي ۽ مصر سميت ٻين رياستن جو به ڀرپور سهڪار حاصل آهي، جيئن خطي ۾ وڌندڙ ڇڪتاڻ کي جلد ختم ڪري سگهجي.
نائب وزيراعظم جو چوڻ هو ته پاڪستان خطي ۽ ان کان ٻاهر امن ۽ استحڪام جي واڌاري لاءِ پنهنجي عزم تي قائم آهي ۽ هر ممڪن سفارتي ڪوششون جاري رکندو. هن زور ڏنو ته موجوده پيچيده حالتن ۾ ڳالهه ٻولهه ۽ سفارتڪاري ئي واحد رستو آهي، جنهن سان خطي ۾ پائيدار امن قائم ٿي سگهي ٿو ۽ جاري تڪرار ختم ٿي سگهن ٿا.
