اسلام آباد (ويب ڊيسڪ): صدر آصف علي زرداري جي صدارت هيٺ ايوانِ صدر ۾ اهم اعليٰ سطحي اجلاس ٿيو، جنهن ۾ سول ۽ عسڪري قيادت معيشت، توانائي منصوبابندي، خوراڪ جي تحفظ ۽ سلامتي پاليسين کي هڪجهڙو رکڻ تي اتفاق ڪيو. اجلاس ۾ عوامي مفاد کي مقدم رکندي موجوده معاشي ۽ توانائي چيلنجز کي منهن ڏيڻ لاءِ جامع حڪمت عملي اختيار ڪرڻ جو فيصلو ڪيو ويو.
اجلاس ۾ وزيراعظم شهباز شريف، فيلڊ مارشل سيد عاصم منير، نائب وزيراعظم اسحاق ڊار، چيئرمين پيپلز پارٽي بلاول ڀٽو زرداري، وفاقي وزير محسن رضا نقوي، وزير خزانه محمد اورنگزيب، وزير توانائي علي پرويز ملڪ ۽ اقتصادي معاملن واري وزير احد خان چيما شرڪت ڪئي.
اجلاس دوران عالمي سطح تي تيل ۽ گئس جي قيمتن ۾ لاهن چاڙهن ۽ ان جا پاڪستان جي معيشت تي اثرن جو جائزو ورتو ويو. اجلاس ۾ شرڪت ڪندڙن مهانگائي جي دٻاءَ کي گهٽائڻ، توانائي جي بچت ۽ استحڪام کي يقيني بڻائڻ تي زور ڏنو. وزيرن پاران اجلاس کي بريفنگ ڏني وئي ته تيل جي قيمتن ۾ استحڪام آڻڻ ۽ مهانگي تيل جي ٻين شعبن تي اثرن کي گهٽائڻ لاءِ بچت جا قدم جاري آهن.
اجلاس ۾ خطي جي مجموعي صورتحال ۽ ان جا پاڪستان جي سلامتي، معيشت ۽ خوراڪ جي نظام تي اثرات تي به غور ڪيو ويو. اجلاس ۾ اتفاق ڪيو ويو ته قومي سطح تي مربوط حڪمت عملي اڻٽر آهي. گڏيل راءِ سان اهو طئي ڪيو ويو ته ادارن جي وچ ۾ تعاون وڌايو وڃي ۽ عوام کي تيل جي گهٽ استعمال، پبلڪ ٽرانسپورٽ کي هٿي ڏيڻ ۽ ڪار شيئرنگ جهڙا قدمن لاءِ آگاهي ڏني وڃي.
ذريعن موجب اجلاس ۾ وزيراعظم شهباز شريف صدر کي خطي جي بدلجندڙ صورتحال ۽ ثالثي جي معاملن بابت تفصيل سان آگاهه ڪيو. گڏيل مشاورت ۾ قومي سلامتي، سياسي ۽ معاشي صورتحال تي به بحث ڪيو ويو، جڏهن ته پاڪستان طرفان ممڪن ڳالهين جي ميزباني بابت به اهم صلاح مشورا ڪيا ويا.
اجلاس ۾ واضح ڪيو ويو ته حڪومت جا سڀ فيصلا عوامي مفاد کي نظر ۾ رکندي ڪيا ويندا ۽ موجوده چيلنجز کي منهن ڏيڻ لاءِ مربوط ۽ جامع حڪمت عملي اختيار ڪئي ويندي.
