تهران (ويب ڊيسڪ) ايران جي فوجي قيادت آمريڪي صدر ٽرمپ جي ڳالهين بابت دعوائن کي سختي سان رد ڪري ڇڏيو آهي. ايران جي مرڪزي فوجي هيڊڪوارٽر خاتم الانبياء جي ترجمان ليفٽيننٽ ڪرنل ابراهيم زلفغاري هڪ بيان ۾ آمريڪا کي خبردار ڪيو آهي.
زلفغاري چيو ته آمريڪا جي اندروني اختلافن جو حال اهو آهي جو هو پاڻ سان ئي ڳالهين جا دعويٰ ڪري رهيو آهي. هن وڌيڪ چيو ته پنهنجي ناڪامي کي معاهدي جو نالو نه ڏنو وڃي. ترجمان جو چوڻ هو ته ايران جي مرضي کانسواءِ نه تيل جون قيمتون اڳئين سطح تي واپس اينديون ۽ نه ئي خطي ۾ پراڻو نظام بحال ٿيندو.
ايران جي فوجي ترجمان آمريڪا کي خبردار ڪندي چيو ته ايران خلاف ڪنهن به قسم جي ڪارروائي جو خيال مڪمل طور ختم ڪرڻو پوندو. هن واضح ڪيو ته ايران جو موقف شروع کان هڪجهڙو رهيو آهي ۽ مستقبل ۾ به رهندو ته آمريڪا سان ڪنهن به صورت ۾ مفاهمت ممڪن ناهي.
زلفغاري جو چوڻ هو: “اسان جهڙا ماڻهو اوهان جهڙن سان ڪڏهن به گڏ نه هلندا، نه هاڻي ۽ نه ئي مستقبل ۾.”
هي بيان اهڙي وقت ۾ سامهون آيو آهي جڏهن آمريڪا ۽ ايران جي وچ ۾ ممڪن مذاکرات بابت متضاد دعوٰي گردش ڪري رهيا آهن ۽ خطي ۾ ڇڪتاڻ برقرار آهي.
