سکر(بيورو) نيشنل ڊزاسٽر مئنيجمينٽ اٿارٽي (اين ڊي ايم اي) سنڌو درياءَ جي هيٺين حصن لاءِ هائيڊرولاجيڪل الرٽ جاري ڪيو آهي، جنهن ۾ چيو ويو آهي ته سنڌ ۾ گڊو، سکر ۽ ڪوٽڙي بئراج تي ٻوڏ جي صورتحال برقرار آهي.
نيشنل ڊزاسٽر مئنيجمينٽ اٿارٽي (اين ڊي ايم اي) جي نيشنل ايمرجنسي آپريشن سينٽر دريائن ۾ وهڪري ۽ ٻوڏ جي صورتحال تي هڪ تفصيلي رپورٽ جاري ڪئي آهي.
رپورٽ موجب، چناب درياءَ ۾ تريم، مرالا، خانڪي ۽ قادر آباد ۾ پاڻي جي سطح ۾ بتدريج گهٽتائي کانپوءِ صورتحال معمول تي آهي، جڏهن ته پنجند ۾ 308,000 ڪيوسڪ سان وڏي سطح جي ٻوڏ آهي.
ڏکڻ پنجاب جي اوڀر ۾ ملتان، مظفر ڳڙهه، راجن پور، لوڌران، بهاولپور، رحيم يار خان، علي پور، سيت پور، لياقت پور، اوچ شريف ۽ احمد پور ضلعن ۾ سخت ٻوڏ جي صورتحال برقرار آهي.
راوي درياءَ جي صورتحال عام طور تي معمول جي آهي، جڏهن ته، گنڊا سنگهه تي 108,000 ڪيوسڪ جو وهڪرو آهي. ستلج درياءَ ۾ صورتحال معمول جي آهي، جڏهن ته سليمانڪي ۽ هيڊ اسلام تي 89,000 ۽ 83,000 ڪيوسڪ جو وهڪرو آهي.
رپورٽ موجب، تربيلا ۽ تونسا تي سنڌو درياهه ۾ صورتحال معمول جي آهي، تنهن هوندي به، گڊو بئراج تي 635,000 ڪيوسڪ سان وڏي سطح جي ٻوڏ آهي، سکر بئراج تي وچولي سطح 538,000 ڪيوسڪ سان ۽ ڪوٽڙي بئراج تي 278,000 ڪيوسڪ سان گهٽ سطح جي ٻوڏ آهي. گڊو بئراج تي وهڪرو ايندڙ 2 کان 3 ڏينهن ۾ سکر بئراج ۽ 24 کان 26 سيپٽمبر تائين ڪوٽڙي بئراج تائين پهچندو. ڪوٽڙي تي وهڪرو 400,000 کان 445,000 ڪيوسڪ تائين وڌڻ جو امڪان آهي.
رپورٽ ۾ چيو ويو آهي ته وزيراعظم جي هدايتن تي، اين ڊي ايم اي سول ۽ فوجي ادارن سان مسلسل رابطي ۾ آهي ۽ بچاءُ ۽ امدادي سرگرمين جي نگراني ڪري رهي آهي. هاڻي تائين، پنجاب ۾ لڳ ڀڳ 2.7 ملين ۽ سنڌ ۾ 1.6 ملين ماڻهن کي محفوظ هنڌن تي منتقل ڪيو ويو آهي.
اين ڊي ايم اي هدايت ڪئي آهي ته متاثر علائقن جا رهواسي فوري طور تي انخلا جي عمل ۾ تعاون ڪن، غير ضروري سفر کان پاسو ڪن، ايمرجنسي ڪٽ تيار رکن ۽ اهم دستاويز محفوظ رکن. عوام کي هدايت ڪئي وئي آهي ته وڌيڪ ڄاڻ لاءِ ڊزاسٽر الرٽ ايپ استعمال ڪن. اين ڊي ايم اي سنڌو درياءَ جي هيٺين حصن لاءِ هائيڊروولوجيڪل الرٽ جاري ڪيو آهي.
اين ڊي ايم اي چيو ته اوڀر دريائن جي وهڪري ۾ واڌ جي ڪري، ايندڙ ڪجهه ڏينهن ۾ سنڌو درياءَ جي هيٺين حصن ۾ سخت ٻوڏ جي صورتحال جو امڪان آهي. اڄ، گڊو بئراج تي پاڻي جو وهڪرو 635,759 ڪيوسڪ آهي، جيڪو 6.5 کان 7 لک ڪيوسڪ وڌي سگهي ٿو.
اين ڊي ايم اي موجب، ايندڙ 24 ڪلاڪن دوران 17 سيپٽمبر تائين سنڌو درياءَ جي هيٺانهين علائقن ۾ تيز وهڪري جو امڪان آهي، جنهن جي ڪري سکر، ڪوٽڙي سميت هيٺانهين علائقن ۾ سخت ٻوڏ واري صورتحال جو امڪان آهي، ماڻهن جي محفوظ انخلا لاءِ قدم کنيا پيا وڃن. ماڻهو احتياطي اپاءَ وٺن ۽ مقامي انتظاميا جي هدايتن تي عمل ڪن.
