ڪراچي (ويب ڊيسڪ) سنڌ جي دادو ضلعي جي تعلقي ميهڙ مان ايندڙ ٻوڏ جو پاڻي اڄ لاڙڪاڻو ۾ سيوهڻ بچائو بند ۾ داخل ٿيندو، جنهن کي نظر ۾ رکندي متاثر علائقن مان ماڻهن کي ڪڍيو پيو وڃي.
دادو مورو پل تي پاڻي جي سطح وڌي وئي آهي، جنهن جي ڪري ميهڙ ۽ دادو تعلقي جي ڪچي جا علائقا متاثر ٿيا آهن. نئون ڳوٺ ۾ زمينداري بند ۾ ڏار پئجي ويو جنهن سبب 4 وڌيڪ ڳوٺ ٻڏي ويا آهن، ڪپهه، تِل ۽ ٻيا فصل پڻ متاثر ٿيا آهن. ضلعي ۾ ٻوڏ کان متاثر ٿيندڙ ڳوٺن جو انگ 46 تائين پهچي ويو آهي. ميهڙ ۽ دادو سان ڳوٺن جو زميني رابطو پڻ ڪٽيل آهي.
گذريل 24 ڪلاڪن دوران سنڌو درياهه ۾ سکر بئراج تي پاڻي جي وهڪري ۾ 24 هزار ڪيوسڪ جي گهٽتائي رڪارڊ ڪئي وئي آهي. اختيارين جو چوڻ آھي تھ ايندڙ 24 ڪلاڪن ۾ سکر بئراج تي پاڻي جي وهڪري ۾ وڌيڪ گهٽتائي جو امڪان آهي. اختيارين موجب ٻوڏ جو پاڻي سومر يا اڱاري تائين ڪوٽڙي بئراج تائين پهچي ويندو.
