ڪراچي: (ويب ڊيسڪ) ننڍي چونڊن جي نگراني لاءِ سنڌ جي 14 ضلعن جي 28 سيٽن تي ڪنٽرول روم قائم ڪيا ويا آهن.
اليڪشن ڪميشن جي ترجمان موجب، صوبائي اليڪشن ڪمشنر سنڌ جي آفيس ۾ هڪ صوبائي مانيٽرنگ ڪنٽرول روم قائم ڪيو ويو آهي. ڪنٽرول روم چونڊن جي سڀني مرحلن جي نگراني ڪندو ۽ نتيجا حاصل ٿيڻ تائين فعال رهندو. شڪايتن يا معلومات لاءِ، فون نمبر 99204544 021 ۽ اي ميل pmcrsindh@gmail.com تي رابطو ڪري سگهجي ٿو.
صوبائي اليڪشن ڪمشنر سنڌ اعجاز انور چوهاڻ ضلعي ريٽرننگ آفيسرن ۽ عملدارن کي سخت هدايتون ڏيندي چيو ته ضمني چونڊن جو پرامن، شفاف ۽ آزادانه انعقاد هر قيمت تي يقيني بڻايو وڃي، چونڊن ۾ ڪا به غفلت برداشت نه ڪئي ويندي.
اعجاز انور چوهاڻ وڌيڪ چيو ته شفاف چونڊ عمل لاءِ سڀئي آفيسر ۽ عملي سڀئي وسيلا استعمال ڪن، پولنگ اسٽيشنن اندر ۽ ٻاهر مڪمل سيڪيورٽي انتظام ڪيا وڃن.
