ٽنڊوڄام (رپورٽ: جنيد گاڏھي) ٽنڊوڄام ۾ ٽول انتظاميه پاران قانون ۽ ضابطن جي ڀڃڪڙي ڪندي رھائشي ڪالوني جي وچ واري روڊ تي بيجا طور تي گاڏين کي روڪي زبردستي ٽول وصول ڪرڻ جو واقعو سامهون آيو آهي.
ذريعن موجب، ٽول پلازا جي جنرل مينيجر پاران ٽنڊوڄام جي مير ڪالوني جي وچ تي گاڏي بيهاري ايندڙ ويندڙ ٽريفڪ کي روڪيو ويو ۽ زبردستي ٽول وصولي جو سلسلو شروع ڪيو ويو. جنهن سبب علائقي واسي شديد غصي ۾ اچي ويا ۽ احتجاج طور گڏ ٿي عملدارن سان منهن ماري ڪئي.
مقامي رهواسين جو چوڻ آهي ته مير ڪالوني اندر رھائشي روڊ آهي، جتان گذرڻ تي ٽول جو ڪو جواز ناهي. بهرحال، ٽول انتظاميه جي عملدارن گاڏيون روڪي، رستي تي رڪاوٽ وجهي روڊ بلاڪ ڪري ڇڏيو.
هڪ ڊرائيور جو چوڻ هو ته، اسان صرف موسا کٽياڻ لنڪ روڊ استعمال ڪري رھيا آھيون، جتي ڪا به ٽول پلازا جي حد لاڳو نٿي ٿئي، پر ان جي باوجود زبردستي ٽول وٺڻ جي ڪوشش ڪئي پئي وڃي.
ٻئي طرف ٽول عملي پاران مؤقف ڏنو ويو ته، اسين حيدرآباد ـ ميرپورخاص روڊ تان گذرندڙ گاڏين کان ٽول وصول ڪري رھيا آھيون، جيڪي لنڪ روڊ استعمال ڪري رھيا آھن.
علائقي واسين انتظاميه کان مطالبو ڪيو آهي ته واقعي جو نوٽيس وٺي ذميوارن خلاف قانوني ڪارروائي ڪئي وڃي ۽ رھائشي علائقن مان ٽول وصولي جو سلسلو فوري طور بند ڪيو وڃي.
