ڄامشورو ( رپورٽ : نور بروھي ) پاڪستان لاءِ اهو وڏي فخر جو لمحو آهي جو ملڪ جي نامور استاد ۽ محقق، انجنيئر ڊاڪٽر الله رکيو جُوڻيجو کي فيوچر ليڊرز ايوارڊ 2025 لاءِ چونڊيو ويو آهي۔ هي ايوارڊ 24 سيپٽمبر تي آءِ ٽي سي اين ايشيا، ايڪسپو سينٽر ڪراچي ۾ هڪ شاندار تقريب دوران ڏنو ويو، جتي سڄي دنيا مان صنعت ۽ تعليم جا نمايان اڳواڻ شريڪ ٿيا۔
هن سال ايوارڊ لاءِ مقابلو غير معمولي طور تي تمام ڏکيو رهيو۔ رڳو پاڪستان مان 500 کان وڌيڪ اميدوارن ۽ پوري ايشيا مان 20 لک کان وڌيڪ درخواستون وصول ٿيون۔ جُيوري ڪيترن مهينن تائين جاري رهندڙ سخت چونڊ عمل کان پوءِ رڳو چند شخصيتن کي چونڊيو، جن ۾ ڊاڪٽر الله رکيو جُوڻيجو پڻ شامل آهن۔ انهن کي انهن اڳواڻن ۾ شمار ڪيو ويو آهي، جيڪي علم، تحقيق ۽ قيادت جي ذريعي مستقبل جي صنعت ۽ سماج جي سمت طئي ڪري رهيا آهن۔
ڊاڪٽر الله رکيو جُوڻيجو پنهنجي علمي ۽ عملي زندگي ۾ هميشه علم ۽ تحقيق جي واڌاري کي پنهنجو مقصد بڻايو آهي۔ هو انجنيئرنگ ۽ ٽيڪنالاجي جي شعبي ۾ گران قدر خدمتون سرانجام ڏئي چڪا آهن۔ انهن جي قيادت ۾ ڪيترائي تحقيقي منصوبا مڪمل ٿيا، جن نه رڳو ملڪ پر عالمي سطح تي به پاڪستان جو نالو روشن ڪيو۔
تعليم جي ميدان ۾ انهن جون ڪوششون نوجوان شاگردن ۽ محققن لاءِ مشعلِ راهه آهن۔ هو جديد ٽيڪنالاجي، مصنوعي ذهانت ۽ تحقيق جي ذريعي نئين نسل کي جدت ۽ ايجاد ڏانهن راغب ڪرڻ لاءِ سرگرم آهن۔
ايوارڊ جي ڪيٽيگريز ۾ صنعت (آءِ ٽي، ٽيڪنالاجي، مصنوعي ذهانت ۽ تحقيق)، انٽرپرينيوئرز (اسٽارٽ اپس، انڪيوبِيشن ۽ ايڪسيليٽر فائونڊرز)، اڪيڊيميا (پروفيسر، محقق ۽ جدت آفرين شاگرد) ۽ ڪميونٽي ۽ ڊائيورسٽي (خواتين براءِ ٽيڪنالاجي، ايڪو سسٽم بلڊرز ۽ عالمي اثرات) شامل آهن۔
ڊاڪٽر الله رکيو جُوڻيجو جي هيءَ ڪاميابي رڳو انهن جي ذاتي ڪوششن جو اعتراف ناهي، پر پاڪستان جي علمي ۽ تحقيقي حلقن لاءِ به فخر جو لمحو آهي۔ انهن جو انتخاب ان ڳالهه جو ثبوت آهي ته پاڪستاني محقق ۽ ماهر عالمي سطح تي پنهنجي صلاحيتن ذريعي مستقبل جو نقشو بدلائڻ جي سگهه رکن ٿا۔
