اسلام آباد (ويب ڊيسڪ) فيڊرل بورڊ آف ريونيو (ايف بي آر) اعلان ڪيو آهي ته انڪم ٽيڪس ريٽرن جمع ڪرائڻ جي آخري تاريخ ۾ ڪا به واڌ نه ڪئي ويندي.
ايف بي آر طرفان جاري ڪيل اعلاميي موجب، ٽيڪس ريٽرن جمع ڪرائڻ جي مقرر تاريخ ۾ واڌ نه ٿيندي. البت، انتهائي مجبوري جي صورت ۾، ڪميٽي جي منظوري سان ٽيڪس ڏيندڙن کي وڌ ۾ وڌ 15 ڏينهن جي واڌ ملي سگهي ٿي، بشرطيڪه واجب الادا ٽيڪس 30 سيپٽمبر 2025 تائين جمع ڪرايو وڃي.
پڌرائي ۾ اهو به واضح ڪيو ويو آهي ته آءِ آر ايس سسٽم جي سستي بابت خبرون غلط آهن. ايف بي آر جو آءِ آر ايس پليٽفارم مڪمل طور تي فعال آهي ۽ بنا ڪنهن رڪاوٽ جي ڪم ڪري رهيو آهي. نئين سادي انڪم ٽيڪس ريٽرن فارم ذريعي آساني سان ريٽرن جمع ڪرايا وڃن ٿا.
اعلاميي ۾ وڌيڪ چيو ويو آهي ته مقرر تاريخ تائين ريٽرن جمع نه ڪرائڻ جي صورت ۾ ٽيڪس ڏيندڙ کي “ليٽ فائلر” قرار ڏنو ويندو ۽ قانون تحت جرمانا لاڳو ڪيا ويندا.
