گهوٽڪي (ڊ.ر) ميرپور ماٿيلو ۾ ماڙي پيٽروليم گيس ڪمپني جي مين گيٽ آڏو مقامي تربيت يافته بي روزگار شاگردن پاران روزگار جي فراهمي لاءِ تيرھين ڏينهن به احتجاجي ڌرڻو جاري رهيو، جڏهن ته صحافين تي پوليس تشدد ۽ ڪوڙا ڪيس داخل ٿيڻ خلاف شروع ٿيل احتجاجي تحريڪ ڪمپني انتظاميه سان ڳالهين بعد ختم ڪئي وئي.
شاگردن جو چوڻ آهي ته ماڙي پيٽروليم گيس ڪمپني انتظاميه ظلم جي انتها ڪري ڇڏي آهي. “اسان مقامي شاگرد آهيون، جن کي ڪمپني طرفان ٽريننگ ته ڏني وئي، پر روزگار نه ڏنو ويو. ان جي ابتڙ ٻين صوبن جي ماڻهن کي گهرائي پڪي نوڪريون ڏنيون پيون وڃن، جيڪا مقامي نوجوانن سان ناانصافي آهي.” شاگردن جو احتجاجي ڪيمپ تي ويهڻ جو سلسلو جاري آهي، جتي وڪيل برادري، صحافين، سياسي ۽ سماجي تنظيمن جي اڳواڻن، قومپرست ڌرين ۽ سول سوسائٽي جي ماڻهن جي حمايت جو سلسلو به ڏسڻ ۾ اچي رهيو آهي.
ٻئي طرف، ٽي ڏينهن اڳ دوران ڪوريج صحافين تي پوليس جي مبينا تشدد ۽ ڪوڙا ڪيس داخل ٿيڻ خلاف گهوٽڪي ضلعي جي صحافين پاران ماڙي پيٽروليم گيس ڪمپني ٻاهران احتجاجي مظاهرو ڪيو ويو. اعظم سهرياڻي ۽ قاضي اگن شر جي اڳواڻي ۾ صحافين ڌرڻو هنيو ۽ نعريبازي ڪئي. صحافين جو چوڻ هو ته پوليس ۽ ڪمپني انتظاميه جو رويو ناقابل قبول آهي، ۽ جيڪڏهن 24 ڪلاڪن اندر ڪوڙا ڪيس ختم نه ڪيا ويا ۽ ذميوار آفيسرن کي برطرف نه ڪيو ويو ته احتجاجي تحريڪ هلائي ويندي.
ان سلسلي ۾ ماڙي پيٽروليم گيس ڪمپني جي انتظاميه ۽ صحافين وچ ۾ ڳالهيون ٿيون، جن بعد صحافين ڌرڻو ختم ڪري ڇڏيو. البت سوشل ميڊيا تي ڪجهه صحافين تي تنقيد ڪئي پئي وڃي ته مبينا طور تي ڪمپني کان ڏهه لک روپيا وٺي ڌرڻو ختم ڪيو ويو، جنهن بابت صحافين طرفان ترديد يا وضاحت سامهون نه آئي آهي.
ان دوران شاگردن جو احتجاج بنا ڪنهن رعايت جي جاري آهي، جن جو مطالبو آهي ته ماڙي گيس انتظاميه مقامي نوجوانن کي روزگار فراهم ڪري، ڌارين جي ڀرتي بند ڪري، ۽ قانوني طور انصاف مهيا ڪري.
