ڄامشورو (رپورٽ: نور بروهي) سنڌ يونائيٽڊ پارٽي جي صدر ۽ درياهه سنڌ بچايو تحريڪ جي ڪنوينر سيد زين شاهه چيو آهي ته پنجاب جي وزيراعليٰ جو بيان “پاڻي به اسان جو، پئسا به اسان جا” وفاق جي خلاف آهي، جنهن جي سخت لفظن ۾ مذمت ڪجي ٿي. هن چيو ته پنجاب اڳ ئي پنهنجي حصي کان وڌيڪ پاڻي وٺي رهيو آهي، ۽ هاڻي وري ڪينالن جي منصوبي ذريعي سنڌ جي حقن تي ڌاڙو هنيو پيو وڃي.
جي. ايم. سيد ايڊييفينس ڄامشوري ۾ پارٽي جي سينٽرل ايگزيڪيوٽو باڊي جي اجلاس کان پوءِ پريس بريفنگ دوران سيد زين شاهه چيو ته هي معاملو صرف مريم نواز جو نه، پر آصف زرداري جو به آهي، جنهن سنڌ جي پاڻي جو سودو ڪيو. هن مطالبو ڪيو ته پيپلز پارٽي وزيراعليٰ پنجاب تي تنقيد ڪرڻ بدران صدر پاڪستان کان ايگزيڪيوٽو آرڊر ذريعي 8 جولاءِ واري ڪينالن جي فيصلي کي رد ڪرائي.
سيد زين شاهه چيو ته سنڌ جي عوام پنهنجي طاقت سان حڪومت کي گوڏا ٽيڪڻ تي مجبور ڪيو، ۽ جيڪڏهن وري سنڌ جي پاڻي تي ڌاڙو هنيو ويو ته سخت مزاحمت ڪئي ويندي. هن پاڪستان جي پرڏيهي پاليسي تي تنقيد ڪندي چيو ته امن بدران ڪاروباري ڊيلون ٿي رهيون آهن، جن تحت زمينون غير ملڪي ماڻهن کي ڏنيون ويون آهن، جيڪو ملڪ جي سلامتي خلاف آهي.
هن پيٽروليم ڊويلپمينٽ لي وي تحت 1300 ارب ٽيڪس لڳائڻ، اين ايف سي تي ٿيل ڌاڙن ۽ معدنيات تي وفاقي قبضي جي مذمت ڪندي چيو ته معدنيات، بندرگاهون، گئس، تيل ۽ ڪوئلو صوبائي ملڪيتون آهن، جن تي وفاق کي معاهدا ڪرڻ جو ڪو حق ناهي.
سيد زين شاهه سنڌ پبلڪ سروس ڪميشن کي ڪاروباري اداري ۾ تبديل ڪرڻ خلاف احتجاج جو اعلان ڪندي چيو ته ميرٽ جي قتل خلاف ڌرڻا ڏنا ويندا. هن ڪراچي جي صورتحال تي ڳڻتي ظاهر ڪندي چيو ته شهر جي 60 سيڪڙو آبادي صاف پاڻي ۽ نيڪال جي سهولت کان محروم آهي، جڏهن ته ٽينڪر مافيا ۽ لينڊ مافيا جو قبضو جاري آهي. هن K-4 منصوبي جي جلد مڪمل ٿيڻ ۽ 900 ارب رپين جي فنڊ جاري ڪرڻ جو مطالبو ڪيو.
سيد زين شاهه سرڪاري ملازمن جي تحريڪ جي حمايت جو اعلان ڪندي چيو ته 9 آڪٽوبر تي “ملڪ جي پرڏيهي پاليسي ۽ قومي مفاد” جي عنوان سان ڪراچي ۾ سيمينار منعقد ڪيو ويندو. هن چيو ته مريم نواز جي بيان تي پيپلز پارٽي جو واڪ آئوٽ صرف ڏيکاءُ آهي، ڇو ته ڪينالن جي منظوري صدر پاڪستان ڏني آهي، ۽ هاڻي اهو ئي ان کي رد ڪري سگهي ٿو.
