غزه: اسرائيلي نيوي عالمي امدادي قافلي “صمود فلوٽيلا” جي ڪشتين کي غزه ويندي روڪي، گهيري ۾ آڻي ڇڏيو ۽ اڳتي وڌڻ کان روڪيو ويو. فلوٽيلا جي ترجمان سيف ابو کشڪ الجزيره سان ڳالهائيندي تصديق ڪئي ته اسرائيلي فوجين ڪيترين ڪشتين جي انٽرنيٽ سروس بند ڪري ڇڏي آهي.
اطلاعن موجب، ڪجهه ڪشتين ۾ اسرائيلي فوجي داخل ٿي ويا آهن، جن مان موصول ٿيل وڊيوز صورتحال جي عڪاسي ڪن ٿيون. ترجمان موجب، اسرائيلي بحريه مسلسل خبردار ڪري رهي هئي ته غزه لاءِ امداد کڻي وڃڻ غير قانوني آهي.
فلوٽيلا جي منتظمين ٻڌايو ته هڪ اهم ٻيڙي “الما” تي اسرائيلي جنگي ٻيڙي جارحاڻي انداز ۾ گهيرو ڪيو، جنهن سبب ڪميونيڪيشن ۽ لائيو اسٽريم متاثر ٿي. ٻي ٻيڙي “سيريَس” کي به 15 منٽ تائين گهيري ۾ رکيو ويو.
اطلاعن موجب، فلوٽيلا اڃا به سفر تي آهي ۽ بدھ ڏينهن غزه کان 90 ناٽيڪل ميل پري هئي، جڏهن ته انهن جو مقصد خميس جي صبح غزه جي ساحل تي پهچڻ آهي. قافلي ۾ 40 کان وڌيڪ ڪشتيون ۽ 500 جي لڳ ڀڳ رضاڪار شامل آهن، جن ۾ اطالوي سياستدان ۽ سويڊن جي ماحولياتي ڪارڪن گريتا ٿنبرگ به شامل آهي.
اٽلي ۽ يونان اسرائيل کان رضاڪارن جي حفاظت جي ضمانت طلب ڪئي آهي ۽ تجويز ڏني آهي ته امداد قبرص ۾ لاهي چرچ جي ذريعي ورهائي وڃي. اسرائيل جو موقف آهي ته فلوٽيلا “حماس جي ڪارروائي” آهي، پر هن وقت تائين ڪو ثبوت پيش نه ڪيو ويو آهي.
ياد رهي ته هن سال جون ۽ جولاءِ ۾ به اهڙا امدادي قافلا روڪيا ويا هئا ۽ عالمي شهرت يافته سماجي ڪارڪنن کي گرفتار ڪيو ويو هو.
وڌيڪ تفصيل اچڻ جاري آهن…
