ڪراچي (شوبز رپورٽر) پاڪستان جي مشهور اداڪار فيروز خان ٻيهر سوشل ميڊيا تي تڪرار جو مرڪز بڻجي ويو، جتي سندس انسٽاگرام اسٽوري وائرل ٿيڻ بعد ٻي زال سان الڳ ٿيڻ جون ڳالهيون زور وٺي ويون آهن.
گذريل رات فيروز خان جي انسٽاگرام اڪائونٽ تان هڪ اسٽوري شيئر ڪئي وئي، جنهن ۾ سندس ٻي زال ڊاڪٽر زينب کي ٽيگ ڪندي سنگين الزام هنيا ويا. پوسٽ ۾ دعويٰ ڪئي وئي ته اداڪار کي بليڪ ميل ڪري شادي تي مجبور ڪيو ويو، ۽ کيس پنهنجي ماءُ ۽ ٻارن کان پري رهڻ لاءِ دٻاءُ ڏنو پيو وڃي.
اسٽوري ۾ اهو به لکيل هو ته فيروز خان نفسياتي علاج ڪرائي رهيو آهي، پر کيس پنهنجي ئي گهر وارن آڏو بدنام ڪرڻ جي ڪوشش ڪئي پئي وڃي.
سوشل ميڊيا تي اسٽوري وائرل ٿيڻ بعد صارفين ۾ بحث ڇڙي ويو ته ڇا فيروز خان ڊاڪٽر زينب سان به الڳ ٿي ويو آهي؟ پر ڪجهه ڪلاڪن بعد فيروز خان وضاحت ڏني ته سندس انسٽاگرام اڪائونٽ هيڪ ٿي ويو هو، ۽ اها پوسٽ بنا اجازت اپلوڊ ٿي، جنهن ۾ ڪا به سچائي ناهي.
ياد رهي ته فيروز خان جون 2024 ۾ ماهر نفسيات ڊاڪٽر زينب سان شادي ڪئي هئي، جڏهن ته ان کان اڳ 2018 ۾ عليزا سلطان سان شادي ۽ 2022 ۾ طلاق ٿي چڪي هئي.
تازو معاملو اڃا تائين غير واضح آهي، ڇو ته فيروز خان يا ڊاڪٽر زينب طرفان ڪو باضابطه بيان سامهون نه آيو آهي.
