اسلام آباد (ويب ڊيسڪ) جماعت اسلامي سان لاڳاپيل اڳوڻي سينيٽر مشتاق احمد خان جي اسرائيلي حراست مان آزاديءَ جي حوالي سان پرڏيھي کاتي اهم اڳڀرائيءَ کان آگاهه ڪيو آهي. ترجمان موجب، پاڪستان جي پرڏيھي وزارت اردن جي راڄڌاني عمان ۾ موجود سفارتخاني جي ذريعي سندن بحفاظت واپسي لاءِ سرگرم ڪوششون ڪري رهي آهي.
پرڏيھي کاتي جي ترجمان چيو آهي ته ڀائر ملڪ اردن جي قيمتي تعاون سان اميد آهي ته ايندڙ ڪجهه ڏينهن ۾ هي عمل ڪاميابيءَ سان مڪمل ٿي ويندو. ترجمان وڌيڪ چيو ته پاڪستان اردن جي مثالي تعاون ۽ فراخدلانه حمايت تي دل جي گهراين سان شڪرگذار آهي.
واضح رهي ته مشتاق احمد خان غزه ڏانهن ويندڙ گلوبل صمود فلوٽيلا قافلي جو حصو هئا، جنهن تي اسرائيلي فورسز حملو ڪري مشتاق احمد سميت ڪيترن ئي ماڻهن کي حراست ۾ ورتو. قافلي ۾ شامل درجنين ماڻهن کي آزاد ڪيو ويو آهي، پر مشتاق احمد سميت ڪجهه ماڻهو اڃا تائين اسرائيلي حراست ۾ آهن.
گذريل ڏينهن به دفتر خارجہ طرفان جاري ڪيل بيان ۾ چيو ويو هو ته هڪ دوست يورپي ملڪ جي سفارتي ذريعن جي معرفت تصديق ٿي آهي ته مشتاق احمد خان اسرائيلي قابض فوج جي تحويل ۾ محفوظ ۽ خيريت سان آهن. ترجمان موجب، مقامي قانوني طريقيڪار تحت سندن عدالت ۾ پيشي ٿيندي، ۽ ملڪ بدريءَ جا حڪم جاري ٿيڻ بعد سندن واپسي فوري طور تي يقيني بڻائي ويندي.
پرڏيھي کاتي جو چوڻ آهي ته پاڪستان پنهنجي بين الاقوامي شراڪتدارن سان فعال رابطي ۾ آهي ته جيئن اسرائيلي قابض فوج جي هٿان غير قانوني طور تي گرفتار ڪيل پاڪستاني شهرين جي سلامتي ۽ واپسيءَ کي يقيني بڻائي سگهجي.
