اسلام آباد (نمائندو خصوصي) – کنڊ جي مسابقتي قيمتن جي معاملي ۾ ملڪ جي شوگر ملز کي سپريم ڪورٽ مان وڏو قانوني رليف ملي ويو، جتي اعليٰ عدالت طرفان Competition Commission of Pakistan جي چيئرمين کي ٻيهر ٻڌڻي جو اختيار ڏيڻ وارو ٽريبونل جو فيصلو ڪالعدم قرار ڏنو ويو.
سپريم ڪورٽ طرفان شوگر ملز جي اپيل تي ٻڌڻي جسٽس شڪيل احمد ۽ جسٽس عامر فاروق ڪئي، جنهن بعد فيصلو Competition Appellate Tribunal ڏانهن ٻيهر موڪليو ويو. جسٽس شڪيل احمد 9 صفحن تي مشتمل فيصلو لکيو، جنهن ۾ عدالت واضح ڪيو ته آئين جو آرٽيڪل 10-A هر شهري کي منصفانه ٽرائل جو حق ڏئي ٿو.
فيصلي ۾ چيو ويو ته چيئرمين جو ڪاسٽنگ ووٽ ڏيڻ غير جانبداري جي اصولن جي خلاف آهي، خاص طور تي جڏهن چيئرمين اڳ ئي پنهنجي راءِ ڏئي چڪو هجي ته فيصلو ڪن ووٽ جو استعمال انصاف جي تقاضائن جي ابتڙ آهي. عدالت وڌيڪ چيو ته ڪاسٽنگ ووٽ جو اختيار صرف انتظامي فيصلا ڪرڻ تائين محدود آهي، عدالتي نوعيت جي ڪارروائين ۾ ان جو اطلاق نه ٿو ڪري سگهجي. انصاف صرف ٿيڻ نه، پر نظر به اچڻ گهرجي.
ياد رهي ته 2021 ۾ Competition Commission of Pakistan طرفان چيني جي قيمتن ۾ واڌ تي ملڪ جي شوگر ملز خلاف ڪارروائي ڪئي وئي هئي. چار رڪني ڪميشن ۾ ٻن ميمبرن جرمانو لڳائڻ جي سفارش ڪئي، جڏهن ته ٻئي ميمبرن ٻيهر جاچ جو مطالبو ڪيو. چيئرمين ڪاسٽنگ ووٽ استعمال ڪندي شوگر ملز تي جرمانا لاڳو ڪيا، جنهن خلاف شوگر ملز Competition Appellate Tribunal ۾ اپيل داخل ڪئي.
ٽريبونل چيئرمين جي ڪاسٽنگ ووٽ کي ڪالعدم قرار ڏيندي ڪيس ٻيهر CCP ڏانهن موڪليو، جنهن جي خلاف شوگر ملز سپريم ڪورٽ سان رجوع ڪيو، جتي هاڻي انهن کي قانوني رليف ملي چڪو آهي.
