ڪراچي: پاڪستان جي مشهور اداڪاره ۽ سپر اسٽار ماهره خان روشنيءَ جي شهر ڪراچي جي موجوده ابتر حالت تي افسوس جو اظهار ڪندي انسٽاگرام تي جذباتي پوسٽ شيئر ڪئي آهي.
ماهره خان ڪراچي جي مختلف علائقن جون تصويرون شيئر ڪندي لکيو ته هوءَ شهر جي حالت ڏسي اڪثر حيران ٿي ويندي آهي. هن ٻڌايو ته ڪم جي سلسلي ۾ کيس اهڙن محلن ۾ وڃڻ جو موقعو مليو، جتي هوءَ اڳي ڪڏهن به نه وئي هئي.
اداڪاره موجب، شهر جي ڪيترن ئي حصن ۾ ماڻهو سخت مشڪلاتن سان زندگي گذاري رهيا آهن—جتي بجلي جي ڊگهي بندش، خوراڪ جي کوٽ، ۽ هفتن کان گڏ ٿيل ڪچرو ماڻهن جي زندگيءَ کي ڏکيو بڻائي ڇڏيو آهي. هن امير ۽ غريب طبقي جي وچ ۾ وڌندڙ فرق تي به روشني وڌي.
ماهره خان چيو ته انهن سڀني مشڪلاتن جي باوجود شهر جي ماڻهن ۾ اميد ۽ محبت اڃا تائين زنده آهي. هن ٻڌايو ته هن ٻارن کي راند ڪندي، ۽ مائرن کي ننڍن باورچي خانن ۾ پراٺا تيار ڪندي ڏٺو، جڏهن ته اهي ٻار صبح سوير مزدوري لاءِ نڪري پوندا آهن.
اداڪاره هڪ اهڙي گهٽيءَ جو ذڪر ڪيو جتي مندر، چرچ ۽ مسجد هڪ ئي ڀت سان گڏ موجود هئا، جيڪو منظر هن کي گهري طور متاثر ڪري ويو. پوسٽ جي آخر ۾ ماهره خان ڪراچي سان پنهنجي محبت جو اظهار ڪندي لکيو: “مان توسان محبت ڪريان ٿي ڪراچي.”
ماهره جي پوسٽ تي عوام طرفان مثبت ردعمل ڏنو ويو، جتي ڪيترن ئي ماڻهن ڪراچي جي مسئلن بابت پنهنجا تجربا ۽ خيال شيئر ڪندي اختيارين کان عملي قدم کڻڻ جو مطالبو ڪيو.
