اسلام آباد: وزيراعظم شهباز شريف قومي خزاني تي بار بڻجندڙ ۽ غيرفعال سرڪاري ادارن جي نجڪاري جو عمل جلد کان جلد مڪمل ڪرڻ جي هدايت ڪئي آهي، جنهن دوران انتظامي ۽ ادارتي پيچيدگين کان بچڻ تي زور ڏنو ويو.
وزيراعظم جي صدارت هيٺ سرڪاري ادارن جي مجوزه نجڪاري بابت جائزو اجلاس ٿيو، جنهن ۾ 24 مان 15 ادارن جي نجڪاري جي پيش رفت بابت وزيراعظم کي آگاهي ڏني وئي.
اجلاس ۾ وفاقي وزير احد خان چيمه، توانائي واري وزير سردار اويس احمد لغاري، وزير مملکت بلال اظهر کياني ۽ ٻين لاڳاپيل ادارن جي آفيسرن شرڪت ڪئي.
وزيراعظم شهباز شريف هدايت ڪئي ته نجڪاري جي عمل ۾ قومي مفاد ۽ ادارن جي مستقبل جي پيشه ورانه صلاحيتن کي نظر ۾ رکيو وڃي. هن عالمي شهرت يافته ماهرن جي خدمتن حاصل ڪرڻ تي زور ڏنو ته جيئن عمل شفاف ۽ موثر طريقي سان مڪمل ٿي سگهي.
وزيراعظم چيو ته سرڪاري ادارن جي اندروني ڪارڪردگي بهتر بڻائڻ لاءِ جامع حڪمت عملي تحت فوري قدم کنيا وڃن. هن واضح ڪيو ته نجڪاري جي عمل ۾ ادارتي تاخير ۽ سرخ فيتو برداشت نه ڪيو ويندو.
وزيراعظم اعلان ڪيو ته هو پاڻ نجڪاري جي عمل جي نگراني ڪندو ۽ ان جي پيش رفت بابت باقاعده اجلاس ٿيندا. هن زور ڏنو ته قومي خزاني تي بار بڻيل ادارن جي نجڪاري جلد مڪمل ڪئي وڃي ته جيئن مالي بوجهه گهٽجي ۽ ادارن جي ڪارڪردگي بهتر ٿئي.
