تل ابيب (ويب ڊيسڪ): اسرائيلي حڪومت واضح ڪيو آهي ته غزه ۾ جنگ بندي جو معاهدو تڏهن ئي نافذ العمل ٿيندو، جڏهن اسرائيلي ڪابينا ان کي متفقه طور تي منظور ڪندي. هي بيان وزيراعظم نيتن ياهو جي دفتر مان جاري ڪيو ويو، جيڪو آمريڪي صدر ڊونلڊ ٽرمپ جي اعلان ۽ مصري ميڊيا جي دعويٰ کانپوءِ سامهون آيو آهي.
اسرائيلي ميڊيا موجب، نيتن ياهو جي دفتر طرفان جاري ڪيل بيان ۾ چيو ويو آهي ته غزه جنگ بندي تي عملدرآمد جو باضابطه آغاز صرف حڪومت جي منظوري کانپوءِ ٿيندو. ان سلسلي ۾ ڪابينا جو اجلاس اڄ شام 6 وڳي ٿيندو، جتي معاهدي تي ووٽنگ ڪئي ويندي.
اسرائيلي ترجمان شوش بدروسيان موجب، جيڪڏهن ڪابينا معاهدي جي منظوري ڏئي ٿي ته 24 ڪلاڪن اندر غزه ۾ جنگ بندي لاڳو ٿي ويندي. ان کانپوءِ 72 ڪلاڪن اندر اسرائيلي يرغمالين ۽ فلسطيني قيدين جي مٽاسٽا جو مرحلو شروع ڪيو ويندو.
ياد رهي ته مصري سرڪاري ذريعن موجب، اڄ منجهند مصر ۾ فريقي ڌرين جنگ بندي معاهدي تي دستخط ڪري ڇڏيا هئا، جنهن تحت جنگ عارضي طور روڪڻ، امدادي سامان جي داخلا ۽ يرغمالين جي آزاديءَ جا قدم کنيا ويندا. پر اسرائيلي حڪومت جي تازين بيانن سان معاهدي جي فوري نفاذ بابت غير يقيني صورتحال پيدا ٿي وئي آهي.
