ڪراچي (ويب ڊيسڪ)ڪراچي ۾ بدنام زمانه ڀارتي خفيه ايجنسي ’را‘ جي نيٽ ورڪ خلاف نیشنل سائبر ڪرائم انويسٽيگيشن ايجنسي (NCCIA) پاران 9 آڪٽوبر 2025ع تي وڏي ڪارروائي ڪئي وئي، جنهن دوران حساس معلومات ليڪ ڪندڙ 2 مشتبہ جوابدار گرفتار ڪيا ويا.
ترجمان NCCIA موجب، ڪارروائي انٽيليجنس معلومات جي بنياد تي ٻين خفيه ادارن جي سهڪار سان عمل ۾ آندي وئي. گرفتار جوابدار پاڪستان جي حساس تنصيبات بابت معلومات سوشل ميڊيا ذريعي بيرون ملڪ منتقل ڪري رهيا هئا.
ڪارروائي دوران جوابدارن جي قبضي مان موبائل فون، ڪمپيوٽرز ۽ مالي لين دين جا اهم ثبوت هٿ آيا، جڏهن ته فرانزڪ جاچ ۾ به وڌيڪ اهم معلومات سامهون آئي، جنهن سان ’را‘ نيٽ ورڪ جي ٻين ميمبرن ۽ انهن جي غير ملڪي رابطن جو پتو لڳائڻ ۾ مدد ملي آهي. تحقيقات جو دائرو وڌايو ويو آهي ۽ وڌيڪ گرفتارين جو امڪان ظاهر ڪيو ويو آهي.
گرفتار جوابدارن خلاف پيڪا ايڪٽ ۽ پاڪستان پينل ڪوڊ جي مختلف دفعات تحت ڪيس داخل ڪيا ويا آهن. ادارو پرعزم آهي ته ملڪ جي ڊجيٽل قومي سلامتي جي تحفظ لاءِ هر ممڪن قدم کنيا ويندا ۽ آن لائن ذريعي ملڪ کي غير مستحڪم ڪرڻ جي ڪنهن به ڪوشش خلاف سخت ڪارروائي ڪئي ويندي
