يروشلم(ويب ڊيسڪ) آمريڪي صدر ڊونلڊ ٽرمپ غزه-اسرائيل جنگبندي معاهدي وچ اوڀر جي نئين تاريخي دور جي شروعات قرار ڏني آهي، جتي هن اعلان ڪيو ته “اڄ رڳو جنگ نه، پر دهشتگردي ۽ انتهاپسندي جو به خاتمو ٿيو آهي.”
اسرائيلي پارليامينٽ (ڪنيست) ۾ خطاب ڪندي صدر ٽرمپ چيو ته 20 زنده يرغمالي ۽ 26 جي باقيات ٻن سالن بعد واپس آڻڻ هڪ شاندار ڪاميابي آهي، جيڪا عالمي تعاون سان ممڪن ٿي. هن چيو ته عرب ۽ اسلامي ملڪ هاڻ امن جا ساٿي بڻجي چڪا آهن، ۽ ايندڙ نسلون هن لمحي کي ياد رکنديون جتي تبديلي شروع ٿي.
صدر ٽرمپ عرب ۽ مسلمان ملڪن جي خاص طور شڪرگذاري ادا ڪئي، جن حماس تي دٻاءُ وجهي امن جي راهه هموار ڪئي. هن چيو ته “امن هاڻ خواب نه، پر حقيقت آهي، جنهن کي اسان گڏجي تعمير ڪري سگهون ٿا.”
خطاب دوران هڪ اسرائيلي اپوزيشن ميمبر پاران صدر ٽرمپ جي خلاف احتجاج ڪيو ويو، جنهن کي سيڪيورٽي عملي ٻاهر ڪڍي ڇڏيو.
صدر ٽرمپ وڌيڪ چيو ته آمريڪي انتظاميه گذريل 8 مهينن ۾ 8 جنگون روڪيون، ۽ وزير خارجه مارڪو روبيو کي آمريڪي تاريخ جو بهترين وزير قرار ڏنو. هن چيو ته “7 آڪٽوبر کي ڪڏهن نه وسارينداسين، ۽ اهڙو واقعو ٻيهر ٿيڻ نه ڏينداسين.”
ايران بابت ڳالهائيندي، صدر ٽرمپ ٻڌايو ته آمريڪا ۽ اسرائيل جي گڏيل آپريشن سان ايران جون ايٽمي تنصيبات ختم ڪيون ويون. 7 B-2 بمبار جهازن ۽ 100 کان وڌيڪ جنگي جهازن ايران تي 14 بم ڪيرايا، جن سان ايران جي ايٽمي صلاحيت ختم ٿي وئي.
هن چيو ته ايران سان امن ۽ تعاون جا دروازا کليل آهن، ۽ ايران کي ايٽمي هٿيار حاصل ڪرڻ کان روڪيو ويو. عراق ۾ داعش خلاف جنگ بابت هن چيو ته جتي 5 سال لڳڻا هئا، اتي آمريڪي جنرل صرف 4 هفتن ۾ فتح حاصل ڪئي.
لبنان ۾ حزب الله جي هٿيارن جي واپسي کي صدر ٽرمپ خوش آئند قرار ڏنو، ۽ چيو ته غزه ۾ حماس هاڻ مستقل طور هٿيار ڇڏيندو. هاڻ ڌيان استحڪام، سلامتي، وقار ۽ معاشي ترقي تي هجڻ گهرجي.
صدر ٽرمپ چيو ته عرب ۽ مسلمان ملڪن گڏجي دهشتگردي خلاف جدوجهد ڪئي، داعش کي شڪست ڏني، غزه جنگبندي حاصل ڪئي، ۽ اسرائيل مخالف بيانيي کي تبديل ڪيو. لبنان ۾ مثبت تبديليون اچي رهيون آهن، ۽ لبناني صدر جي رياستي اسلحي تي ڪنٽرول جي ڪوششن جي حمايت ڪئي وئي.
آخر ۾ صدر ٽرمپ چيو ته ايران سان امن معاهدو شاندار هوندو، ۽ غزه جي تعمير نو ۾ آمريڪا ڀرپور تعاون ڪندو. هن چيو ته “غزه جي عوام لاءِ امن ۽ بحالي اسان جي ترجيح آهي، ۽ مان انهن اڳواڻن سان جلد ملاقات ڪندس، جن غزه ۾ امن ممڪن بڻايو.”
