اسلام آباد(ويب ڊيسڪ)پاڪستان جي پرڏيهي پاليسيءَ ۾ افغان طالبان بابت اهم تبديلي سامهون آئي آهي، جيڪا 11 آڪٽوبر تي پاڪستاني پوسٽن تي افغان فورسز جي بلااشتعال حملي کان پوءِ واضح ٿي آهي. دفتر خارجہ طرفان جاري ڪيل بيان ۾ افغان حڪومت لاءِ “طالبان حڪومت” جو لفظ استعمال ڪيو ويو، جيڪو ان جي قانوني حيثيت تي سوال اٿارڻ جي علامت سمجهيو پيو وڃي.
اگسٽ 2021ع ۾ جڏهن طالبان افغانستان ۾ اقتدار تي واپس آيا، تڏهن پاڪستان انهن جو وڏو حمايتي بڻجي سامهون آيو هو. اسلام آباد نه رڳو نئين حڪمرانن سان ويجهڙائپ جي وڪالت ڪئي، پر عالمي سطح تي افغانستان جي قانوني حيثيت لاءِ به ڪوششون جاري رکيون.
پر پاڪستان جي بنيادي ڳڻتي هميشه ڪالعدم تحريڪ طالبان پاڪستان (ٽي ٽي پي) ۽ ان سان لاڳاپيل گروپن طرفان افغان سرزمين جي استعمال بابت رهي آهي. پاڪستان کي اميد هئي ته طالبان اڳوڻين حڪومتن (ڪرزي ۽ غني) جيان انهن گروپن کي برداشت نه ڪندا، پر ڪجهه مهينن اندر ئي اسلام آباد کي اهو احساس ٿيو ته افغان طالبان ۽ ٽي ٽي پي هڪ ئي سڪي جا ٻه رخ آهن.
فوج جي ميڊيا ونگ افغان حملي ۽ پاڪستان جي ردعمل بابت آپريشنل تفصيل فراهم ڪيا آهن، جڏهن ته دفتر خارجہ جي دير سان جاري ڪيل بيان ۾ افغان پاليسيءَ ۾ واضح تبديليءَ جا اشارا ڏنا ويا آهن.
بيان ۾ پاڪستان طرفان افغانستان لاءِ “پرامن، مستحڪم، دوستاڻو، جامع، علائقائي طور ڳنڍيل ۽ خوشحال” مستقبل جي خواهش جو اظهار ڪيو ويو آهي. ساڳئي وقت پاڪستان اها اميد به ظاهر ڪئي آهي ته طالبان حڪومت ذميواريءَ سان ڪم ڪندي، پنهنجن واعدن جو احترام ڪندي ۽ دهشتگرديءَ جي خاتمي لاءِ تعميري ڪردار ادا ڪندي.
سرڪاري ذريعن موجب، پاڪستان هاڻ طالبان حڪومت جي حمايت تيسين نه ڪندو، جيستائين اها پنهنجي پاليسين ۾ تبديلي آڻي ۽ پاڪستان جي سلامتي خدشن کي سنجيدگيءَ سان نه وٺي. ان سان گڏوگڏ، پاڪستان سرحد پار حملي جي صورت ۾ فوري ردعمل لاءِ نوان اصول به طئي ڪري ڇڏيا آهن، جن تحت افغانستان جي اندر ڪارروائي جو امڪان رد نه ٿو ڪري سگهجي.
