واشنگٽن(ويب ڊيسڪ) وفاقي ناڻي ۽ محصول واري وزير سينيٽر محمد اورنگزيب چيو آهي ته امريڪي انتظاميه سان ڪامياب ڳالهين جي نتيجي ۾ پاڪستان لاءِ ٽيرف ڊيل تي عمل ممڪن ٿيو، جيڪو ٻنهي ملڪن جي واپاري لاڳاپن ۾ اهم اڳڀرائي آهي.
واشنگٽن ڊي سي ۾ معاون امريڪي ناڻي واري وزير رابرٽ ڪپروتھ ۽ قونصلر جوناتھن گرينسٽين سان ملاقات دوران سينيٽر اورنگزيب چيو ته پاڪستان جي معاشي بنيادن کي مضبوط ڪرڻ لاءِ آءِ ايم ايف پروگرام تحت اهم قدم کنيا ويا آهن. هن امريڪي اختيارين کي ورچوئل اثاثن جي ريگيوليشن بابت قانون سازي کان به آگاهه ڪيو.
وفاقي وزير امريڪي ڪمپنين کي پاڪستان ۾ تيل، گئس، معدنيات، زراعت ۽ آءِ ٽي جي شعبن ۾ سيڙپڪاري جي دعوت ڏني. بعد ۾ يو ايس پاڪستان بزنس ڪائونسل جي ميمبرن سان ملاقات دوران هن ميڪرو اڪنامڪ اشاريَن ۾ بهتري، خانگي شعبي جي اڳواڻي ۽ ڪاروباري ادارن کي درپيش چئلينجن بابت تفصيل سان روشني وڌي.
هن زور ڏنو ته حڪومت پاڪستان ڪاروباري برادري کي وڌ کان وڌ رليف ڏيڻ لاءِ پرعزم آهي. هن تجارتي معاهدي جي روشنيءَ ۾ گورنمينٽ ٽو گورنمينٽ ۽ بزنس ٽو بزنس تعاون وڌائڻ جي خواهش جو اظهار ڪيو، خاص طور تي معدنيات، زراعت، آءِ ٽي ۽ فارماسيوٽيڪلز جي شعبن ۾.
سينيٽر اورنگزيب سٽي بئنڪ جي نمائندن سان ملاقات دوران بئنڪ جي پاڪستان سان لاڳاپن جي ساراهه ڪئي ۽ ملڪ جي مالي استحڪام بابت تفصيل فراهم ڪيا. هن پاڪستان جي ڊجيٽل جدت ۽ مالي خدمتن جي واڌاري تي به روشني وڌي.
آءِ ايف سي جي علائقائي نائب صدر رڪارڊو پليٽي سان ملاقات دوران وزير ناڻي ملڪ جي ميڪرو اڪنامڪ اشاريَن کي اجاگر ڪيو ۽ آءِ ايف سي جي پاڪستان سان ڏهاڪن تي ٻڌل شراڪتداري جي واکاڻ ڪئي. هن ريڪو ڊڪ منصوبي جي مالي بندش تي اتفاق ۽ اسلام آباد ۾ علائقائي آفيس جي قيام کي خوش آئند قرار ڏنو.
اسلامي ترقياتي بئنڪ جي صدر ڊاڪٽر محمد سليمان الجاسر سان ملاقات دوران وزير ناڻي بئنڪ جي تعاون تي شڪريو ادا ڪيو. ملاقات ۾ ايم سڪس جي ٻن سيڪشنز جي فنانسنگ جي منظوري، پوليو جي خاتمي ۽ آئل فنانسنگ سهولت بابت تعاون تي زور ڏنو ويو.
دولت مشترڪه جي ناڻي واري وزيرن جي اجلاس ۾ خطاب ڪندي سينيٽر اورنگزيب هڪ مضبوط ۽ خوشحال دولت مشترڪه جي هدف لاءِ عمل ۽ نتيجن تي ڌيان ڏيڻ جي اهميت تي زور ڏنو. هن موسمياتي فنانسنگ، لاس اينڊ ڊيميج فنڊ ۽ فني معاونت بابت قدمن جي حمايت ڪئي.
