اسلام آباد(ويب ڊيسڪ)ملڪ ۾ ايندڙ 15 ڏينهن لاءِ تيل جي قيمتن ۾ نمايان گهٽتائي جو امڪان آهي، جنهن سان عوام کي مهانگائي جي مار کان ڪجهه رليف ملي سگهي ٿو.
ذريعن موجب 16 آڪٽوبر 2025 کان پيٽرول جي قيمت ۾ 6.10 رپيا في ليٽر ۽ هاءِ اسپيڊ ڊيزل جي قيمت ۾ 97 پئسا في ليٽر گهٽتائي جو امڪان آهي. ان سان گڏ گاسليٽ جي قيمت ۾ 2.75 رپيا ۽ لائيٽ ڊيزل آئل جي قيمت ۾ 1.64 رپيا في ليٽر گهٽ ٿيڻ جي اميد آهي.
پيٽروليم انڊسٽري پنهنجي حساب ڪتاب مڪمل ڪري اوگرا کي موڪلي ڇڏيو آهي، جيڪا اڄ شام تائين قيمتن ۾ تبديليءَ جي سمري پيٽروليم ڊويزن ذريعي ناڻي واري وزارت کي موڪليندي. وزارت خزانه وزيراعظم سان مشاورت کان پوءِ قيمتن ۾ تبديليءَ جي حتمي منظوري ڏيندي، جنهن بعد نيون قيمتون 16 آڪٽوبر کان لاڳو ٿينديون.
هي تبديلي عالمي مارڪيٽ ۾ تيل جي قيمتن ۾ گهٽتائي ۽ مقامي سطح تي صارفين جي دٻاءَ جي نتيجي ۾ متوقع آهي. تجزيه نگارن جو چوڻ آهي ته جيڪڏهن اها گهٽتائي لاڳو ٿي وئي ته اها مهانگائي جي موجوده لهر ۾ عوام لاءِ هڪ مثبت قدم هوندو.
