اسلام آباد (ويب ڊيسڪ) پاڪستان پنهنجي خلائي تاريخ ۾ هڪ نئين باب جو آغاز ڪندي پهريون هائپر اسپيڪٽرل سيٽلائيٽ (HS-1) 19 آڪٽوبر تي چين مان لانچ ڪرڻ وارو آهي. سپارڪو جي ترجمان موجب، هي مشن قومي خلائي پاليسي ۽ وژن 2047 جي طرف هڪ اهم قدم آهي.
سپارڪو جي بيان مطابق، ايڇ-ايس ون سيٽلائيٽ ملڪ ۾ زراعت، شهري ترقي، ۽ ماحولياتي نگراني لاءِ انتهائي اهميت جو حامل هوندو. هي سيٽلائيٽ جديد ڊيٽا ڪيلي بريشن ۽ درست زراعت (Precision Agriculture) لاءِ جديد ٽيڪنيڪل سهولتون فراهم ڪندو، جنهن سان فصلن جي پيداوار ۾ 15 کان 20 سيڪڙو واڌ جي اميد آهي.
رپورٽ موجب، هي سيٽلائيٽ سيلابن، زميني سلائيڊن ۽ ٻين قدرتي آفتن جي اڳڪٿي ۾ مددگار ثابت ٿيندو، جڏهن ته ماحولي تبديلي ۽ ارضياتي خطرن جي بروقت نگراني لاءِ به اهم ڪردار ادا ڪندو.
ان کان علاوه، ايڇ-ايس ون ملڪ ۾ انفرااسٽرڪچر ميپنگ ۽ شهري منصوبابندي لاءِ نيون راهون کوليندو، جنهن سان پاڪستان سائنس ۽ ٽيڪنالاجي جي نئين دور ۾ داخل ٿيندو.
سپارڪو جي ترجمان جو چوڻ آهي ته پاڪستان جو هي هائپر اسپيڪٽرل مشن نه رڳو خلائي تحقيق پر جديد سائنسي ۽ ٽيڪنيڪي ايپليڪيشنز جي ميدان ۾ به ملڪ کي عالمي سطح تي اڳڀرو بڻائڻ ۾ مدد ڏيندو.
