اسلام آباد: پاڪستان جي بچاءُ واري وزير خواجه آصف چيو آهي ته موجوده صورتحال ۾ افغان طالبان دراصل ڀارت جي مفادن جي خدمت ڪري رهيا آهن، ۽ جيڪڏهن سيز فائر جي ڀڃڪڙي ڪئي وئي ته پاڪستان طرفان سخت جواب ڏنو ويندو.
خانگي ٽي وي جي پروگرام ۾ ڳالهائيندي خواجه آصف واضح ڪيو ته افغانستان طرفان سيز فائر جي ڀڃڪڙي جاري رهي ته پاڪستان پنهنجي اختيار جو استعمال ڪندو. هن ٻڌايو ته 48 ڪلاڪن جو سيز فائر لاڳو آهي، پر جيڪڏهن ان جي ڀڃڪڙي ٿي ته ردعمل ضرور ايندو.
بچاءَ واري وزير جو چوڻ هو ته طالبان جا فيصلا ۽ ڪارروايون ڀارت جي اسپانسرشپ هيٺ ٿي رهيون آهن، ۽ ڪابل حڪومت هن وقت دهلي جي پراڪسي جنگ وڙهي رهي آهي. هن چيو ته طالبان جي نيت امن آڻڻ جي نه، پر تنازع وڌائڻ جي آهي.
خواجه آصف افغان دعويٰ تي تنقيد ڪندي چيو ته افغانستان جيڪو ٽينڪ ڏيکاري رهيو آهي، اهو پاڪستان وٽ موجود ئي ناهي، ۽ سمجهه کان ٻاهر آهي ته اهڙو جھوٽو دعويٰ ڇو ڪيو پيو وڃي. هن طنزيه انداز ۾ چيو ته معلوم ناهي اهو ٽينڪ ڪهڙي ڪباڙي مان ورتو ويو آهي.
بچاءُ واري وزير ٻڌايو ته ڪجهه دوست ملڪن جي ڳالهه ٻولهه جي آڇ تي پاڪستان مذاڪرات لاءِ تيار ٿيو هو ۽ ويزا جي درخواستون به ڏنيون ويون، پر جنگ جي شروعات کانپوءِ اهو عمل معطل ٿي ويو ۽ درخواستون واپس وٺي ويون.
خواجه آصف آمريڪي صدر ڊونلڊ ٽرمپ بابت چيو ته هن عالمي سطح تي جنگ بندي جي ڪوششون ڪيون آهن، ۽ جيڪڏهن هو هتي به جنگ بندي جا خواهشمند آهن ته موسٽ ويلڪم.
