اسلام آباد: اسلام آباد هاءِ ڪورٽ جي جسٽس انعام امين منهاس واضح ڪيو آهي ته جيڪڏهن تعليمي ادارن ۾ منشيات جي فراهمي ۾ ڪو ملوث ٿيو ته ذميواري پرنسپل تي عائد ٿيندي ۽ ان خلاف قانوني ڪارروائي ڪئي ويندي.
وفاقي تعليمي ادارن ۾ منشيات جي شڪايتن بابت ڪيس جي ٻڌڻي دوران پوليس پنهنجي رپورٽ پيش ڪئي، جنهن موجب رواں سال 1314 منشيات جا ڪيس داخل ٿيا ۽ 1408 جوابدار گرفتار ڪيا ويا. رپورٽ ۾ ڄاڻايو ويو ته تعليمي ادارن جي آس پاس 22 منشيات وڪرو ڪندڙن کي گرفتار ڪيو ويو، جڏهن ته 3 ڪلو هيروئن، 3 ڪلو آئس ۽ 18 ڪلو چرس هٿ ڪئي وئي.
سماعت دوران پوليس ۽ سرڪاري وڪيل ٻڌايو ته منشيات جي خاتمي لاءِ “نشو هاڻ نه” جي نالي سان مهم شروع ڪئي وئي آهي، تعليمي ادارن ۾ آگاهي لاءِ ڪميٽيون قائم ڪيون ويون آهن ۽ سيمينارز به منعقد ڪيا ويا آهن. جسٽس انعام منهاس ان تي سوال ڪيو ته اسڪول ڪميٽيون ڪيئن ٺاهي رهيا آهن؟ ۽ انهن جي ڪارڪردگي جي رپورٽ پيش ڪرڻي پوندي.
عدالت هدايت ڪئي ته تعليمي ادارن ۾ ڪا به تقريب يا شيءِ آڻڻ لاءِ پرنسپل جي اجازت لازمي هوندي. منشيات جي فراهمي جي صورت ۾ پرنسپل خلاف ڪارروائي ڪئي ويندي. عدالت چيو ته جرمانا مسئلي جو حل نه آهي، ريگيوليٽر کي صورتحال جو جائزو وٺڻو پوندو.
جسٽس انعام منهاس پوليس کي هدايت ڪئي ته منشيات جي ڪيسن جي روشني ۾ انهن تعليمي ادارن جو دورو ڪري رپورٽ پيش ڪئي وڃي. جيڪڏهن منشيات اسڪول، ڪاليج يا يونيورسٽين تائين پهچي رهي آهي ته ان جي ذميواري انتظاميا تي عائد ٿيندي.
