راولپنڊي (ويب ڊيسڪ) پاڪ بحريه جي سربراهه امير البحر ايڊمرل نويد اشرف آمريڪا جو دورو ڪيو، جتي هن آمريڪي بحريه ۽ سول قيادت سان اهم ملاقاتون ڪيون، جن سان ٻنهي ملڪن جي وچ ۾ دفاعي تعاون کي وڌيڪ هٿي ملندي.
آءِ ايس پي آر جي بيان موجب، ايڊمرل نويد اشرف آمريڪي ڊپٽي چيف آف دي نيول اسٽاف آپريشنز ۽ يو ايس ڪوسٽ گارڊ جي وائس ڪمانڊنٽ سان الڳ الڳ ملاقاتون ڪيون، جن دوران پيشه ورانه دلچسپي، علائقائي سلامتي، تربيت ۽ ميرٽائيم تعاون تي تفصيلي ڳالهه ٻولهه ٿي.
ايڊمرل نويد اشرف آمريڪا جي نئشنل ڊي فنس يونيورسٽي جو دورو پڻ ڪيو، جتي هن يونيورسٽي جي صدر وائس ايڊمرل پيٽر اي. گارون سان ملاقات ڪئي. ان دوران ٻنهي ملڪن جي بحري ادارن جي وچ ۾ تعاون وڌائڻ تي زور ڏنو ويو.
نيول چيف آمريڪي وزارت خارجه جو به دورو ڪيو، جتي هن سياسي ۽ عسڪري معاملن جي ڊپٽي اسسٽنٽ سيڪريٽري اسٽينلي ايل براؤن سان ملاقات ڪئي.
ايڊمرل نويد اشرف آمريڪي اسڪالرز ۽ ٿنڪ ٽينڪ جي ماهرن سان هڪ تقريب ۾ خطاب ڪندي پاڪستان بحريه جي علائقائي ميرٽائيم سيڪيورٽي چئلينجن سان نبر آزما ٿيڻ ۽ گڏيل ميرٽائيم ڪوششن ۾ تعاون تي روشني وڌي.
هن دوري کي پاڪستان ۽ آمريڪا جي وچ ۾ ميرٽائيم سيڪيورٽي ۽ دفاعي لاڳاپن جي مضبوطي لاءِ اهم قدم قرار ڏنو پيو وڃي.
