اسلام آباد (ويب ڊيسڪ) وفاقي گهرو وزير محسن نقوي سان جمعيت علماءِ پاڪستان جي سيڪريٽري جنرل علامه شاه اويس نوراني جي ملاقات اسلام آباد ۾ ٿي، جنهن دوران مذهبي هم آهنگي، رواداري ۽ قومي اتحاد تي تفصيلي ڳالهه ٻولهه ڪئي وئي.
ملاقات دوران اتفاق ڪيو ويو ته ڪنهن به بيگناهه فرد خلاف ڪارروائي نه ڪئي ويندي، بيگناهن کي آزاد ڪيو ويندو ۽ ملڪ جي ڪنهن به مدرسه کي بند نه ڪيو ويندو. شرپسندن سان سختي سان نمٽڻ جو به فيصلو ڪيو ويو.
وفاقي وزير محسن نقوي واضح ڪيو ته قانون هٿ ۾ وٺڻ جي اجازت نه ڏني ويندي، ۽ رياست خلاف هٿيار کڻڻ جي هرگز اجازت نه آهي. هن چيو ته قائداعظم جي پاڪستان ۾ انتهاپسندي ۽ شرپسندي جي ڪا گنجائش نه آهي.
هن وڌيڪ چيو ته بدامني، انتشار ۽ انتهاپسندي پکيڙيندڙ عنصرن سان آهني هٿن سان نمٽيو ويندو. مذهبي هم آهنگي ۽ صبر جي واڌاري ۾ علماءِ جو ڪردار قابلِ تعريف آهي. پائيدار امن ۽ رواداري جي واڌاري لاءِ سڀني طبقات کي پنهنجو ڀرپور ڪردار ادا ڪرڻو پوندو. ديني تعليم جو فروغ اسان سڀني جو گڏيل فرض آهي.
علامه اويس نوراني چيو ته ملڪ ۾ امن، رواداري ۽ ڀائيچاري جي واڌاري لاءِ جمعيت علماءِ پاڪستان هر ممڪن سهڪار جاري رکندي.
