انتاناناريوو (ويب ڊيسڪ) مڊغاسڪر ۾ تازين سياسي اٿل پٿل کانپوءِ ڪرنل مائيڪل رينڊريانرينا ملڪ جي نئين صدر طور حلف کڻي ورتو. گاڌي واري هنڌ انتاناناريوو ۾ ٿيل تقريب ۾ اعليٰ فوجي آفيسرن، سياسي اڳواڻن، نوجوان تحريڪ جي نمائندن ۽ غير ملڪي وفدن شرڪت ڪئي.
هي تبديلي ملڪ ۾ جنريشن زي جي خوني احتجاج ۽ فوجي مداخلت کانپوءِ عمل ۾ آئي، جنهن دوران اڳوڻو صدر اينڊري راجويلينا ملڪ ڇڏي فرار ٿي ويو. پارليامينٽ طرفان ’ذميواري کان فرار‘ جي الزام هيٺ راجويلينا جو مواخذو ڪيو ويو ۽ کيس صدارت تان هٽايو ويو.
ان کانپوءِ عبوري فوجي ڪائونسل اقتدار سنڀالي ورتو، قومي اسيمبلي کانسواءِ باقي سڀئي پارلياماني ادارا ختم ڪيا ويا. ڪائونسل جي سربراهي ڪرنل رينڊريانرينا وٽ هئي، جن کي ملڪ جي عدالتِ عاليه صدر طور ڪم ڪرڻ جي اجازت ڏني.
عدالتي فيصلي کانپوءِ رينڊريانرينا کي فوجي سربراهه بدران آئيني صدر جي حيثيت حاصل ٿي وئي. حلف برداري کانپوءِ پنهنجي خطاب ۾ صدر رينڊريانرينا چيو ته “اڄ اسان جي تاريخ جو نئون باب کولجي چڪو آهي، اسان ماضي کي وساري سياسي، معاشي ۽ انتظامي سڌارا آڻينداسين.”
هن اعلان ڪيو ته ايندڙ 18 کان 24 مهينن اندر نوان چونڊون ڪرائي وينديون، آئيني سڌارا ۽ چونڊ قانون تيار ڪيا ويندا، جڏهن ته هڪ “گڏيل وزيراعظم” جي مقرري لاءِ مشاورت جاري آهي.
صدر رينڊريانرينا فوجي بغاوت جي الزام کي رد ڪندي چيو ته عدالت جي منظوري سان هو آئيني صدر بڻيا آهن. ٻئي طرف، معزول صدر راجويلينا جي حامين ان تبديلي کي آئيني ڀڃڪڙي قرار ڏنو آهي.
راجويلينا اعتراف ڪيو آهي ته جان جي خطري سبب هن ملڪ ڇڏڻ جو فيصلو ڪيو، ۽ هو فرانس جي جزيري ري يونين کان دبئي روانو ٿيو. ياد رهي ته مڊغاسڪر جي آزادي (1960) کانپوءِ هي ٽيون دفعو آهي جو ملڪ جو سربراهه اقتدار تان هٽايو ويو ۽ فوجي عبوري حڪومت قائم ڪئي وئي.
