اسلام آباد – پاڪستان پيپلز پارٽي پارليمنٽرينز جي مرڪزي ترجمان شازيه مري چيو آهي ته 18 آڪٽوبر جمهوريت جي پروانن جو ڏينهن آهي، جيڪو شهيدن جي بهادري، وفاداري ۽ قربانين جي ياد ڏياريندڙ تاريخي لمحو آهي.
سانحي ڪار ساز جي شهيدن کي خراجِ عقيدت پيش ڪندي شازيه مري پنهنجي پيغام ۾ چيو ته شهيدن جو حوصلو ناقابل شڪست هو، انهن جي وفاداري ۽ قربانيءَ کي سرخ سلام پيش ڪيان ٿي.
هن چيو ته 18 آڪٽوبر 2007 جو ڏينهن جمهوريت جي عاشقن جي قربانيءَ جو مظهر آهي، جڏهن شهيد محترمه بينظير ڀٽو جي وطن واپسي تي 30 لک کان وڌيڪ ماڻهن تاريخي استقبال ڪيو، ۽ ان ڏينهن 180 بهادر جيالن پنهنجي قائد ۽ جمهوريت لاءِ جان جو نذرانو پيش ڪيو.
شازيه مري ٻڌايو ته چيئرمين بلاول ڀٽو زرداري جي هدايت تي 18 آڪٽوبر تي ملڪ جي سڀني ضلعي هيڊڪوارٽرن تي دعائيه تقريبون منعقد ڪيون پيون وڃن، جتي شهيدن جي ياد ۾ فاتحه خواني ۽ خراجِ عقيدت پيش ڪيو ويندو.
هن وڌيڪ چيو ته حملو ڪندڙ جمهوريت جي روشني کي ختم ڪرڻ چاهيندا هئا، پر ناڪام ٿيا. اسان شهيد بينظير ڀٽو ۽ سانحي ڪار ساز جي شهيدن جي مشن کي اڳتي وڌائينداسين.
