ڪراچي (ويب ڊيسڪ) پاڪستان پيپلز پارٽي جي چيئرمين بلاول ڀٽو زرداري چيو آهي ته 18 آڪٽوبر جو ڏينهن شهيد بينظير ڀٽو جي قافلي تي ٿيل حملي ۾ شهيد ٿيل ڪارڪنن جي ياد جو ڏينهن آهي، ڪارساز سانحو ملڪ جي تاريخ جي وڏن سانحن مان هڪ آهي.
هو ڪراچي ۾ سانحي ڪار ساز جي ورسي جي تقريب کي خطاب ڪري رهيو هو، جتي هن چيو ته بينظير ڀٽو دهشتگردن کان نه ڊني، پنهنجي جدوجهد جاري رکندي شهيد ٿي، پيپلز پارٽي اڄ به انهن جي رستي تي هلندي پئي اچي. هن وڌيڪ چيو ته پاڪستان جي تاريخ ۾ ڪيترائي سانحا ٿيا آهن، پر سانحو ڪار ساز هڪ انتهائي اهم ۽ المناڪ واقعو هو.
بلاول ڀٽو زرداري چيو ته هي واقعو وفاق خلاف هڪ سازش هو، جنهن جا ڪيترائي پاسا اڃا تائين غير واضح آهن، بدقسمتي سان ملڪ ۾ اهڙيون ڳالهيون ورجائجي رهيون آهن. هن ٻڌايو ته اڄ پارٽي جي ايگزيڪيوٽو ڪميٽي جو اجلاس ٿيندو، جنهن ۾ مختلف معاملن تي پارٽي نمائندا پنهنجا خيال پيش ڪندا. هن چيو ته وزيراعظم سان سندس ملاقات ٿي آهي، جنهن ۾ ٿيل ڳالهيون به اجلاس ۾ پيش ڪيون وينديون.
ان کان اڳ صدرِ آصف علي زرداري سانحي ڪار ساز جي ورسي جي موقعي تي شهيد بينظير ڀٽو کي خراجِ عقيدت پيش ڪيو ۽ جمهوريت جي سڀني شهيدن کي سلام پيش ڪيو.
صدرِ پنهنجي پيغام ۾ چيو ته بينظير ڀٽو واضح خطرن جي باوجود وطن واپس آئيون، سانحي ڪار ساز کان پوءِ به پنهنجي مشن تي ثابت قدم رهيون. هن زخمين جي عيادت ڪئي ۽ لواحقين سان همدردي جو اظهار ڪيو، جيڪو سندن انسان دوستي ۽ عزم جي علامت آهي.
