فيصل آباد (ويب ڊيسڪ) پاڪستاني فیشن انڊسٽري جي ابھرتي ماڊل ۽ مشهور ٽڪ ٽاڪر روميصا سعيد ٽريفڪ حادثي ۾ زخمي ٿيڻ بعد علاج دوران وفات ڪري وئي.
روميصا سعيد انهن نوجوان ماڊلز مان هئي، جيڪي فیشن ۽ سوشل ميڊيا جي ميدانن ۾ تيزي سان مقبوليت حاصل ڪري رهيون هيون. هوءَ پنهنجي دلڪش شخصيت سبب فیشن شوز ۾ نمايان رهي، جڏهن ته ٽڪ ٽاڪ ۽ انسٽاگرام تي به هزارين مداحن جي توجه جو مرڪز هئي.
رپورٽن موجب، روميصا سعيد ڪجهه ڏينهن اڳ فيصل آباد جي ويجهو هڪ روڊ حادثي جو شڪار ٿي. هن کي سخت زخمون آيون، جن بعد کيس ترت ئي مقامي اسپتال منتقل ڪيو ويو، جتي هوءَ ڪيترن ئي ڏينهن تائين علاج هيٺ رهي. افسوسناڪ طور، 17 آڪٽوبر تي هوءَ زخمن جي تاب نه آندي ۽ لاڏاڻو ڪري وئي.
شوبز ۽ فیشن سان لاڳاپيل شخصيتن سندس اوچتي وفات تي گهري ڏک جو اظهار ڪيو ۽ سوشل ميڊيا تي کيس خراجِ عقيدت پيش ڪيو. ڪيترن ئي صارفين دعائيه پيغام شيئر ڪندي لکيو ته “روميصا هڪ باصلاحيت ۽ خوش مزاج ڇوڪري هئي، سندس کوٽ هميشه محسوس ٿيندي.”
مرحومه جي نمازِ جنازه فيصل آباد ۾ ادا ڪئي وئي، جنهن بعد تدفين ننڪانه صاحب جي مقامي قبرستان ۾ عمل ۾ آئي.
روميصا سعيد جي اوچتي وڇوڙي فیشن انڊسٽري ۽ سوشل ميڊيا جي برادري کي سوڳوار ڪري ڇڏيو آهي، جتي ماڻهو اڃا تائين سندس مرڪندڙ لمحن ۽ مثبت توانائي کي ياد ڪري رهيا آهن.
