اسلام آباد – پاڪستان خلائي ٽيڪنالاجي جي نئين دور ۾ داخل ٿي ويو آهي، جتي سپارڪو پاران تيار ڪيل پهريون هائپر اسپيڪٽرل سيٽلائيٽ HS-1 چين مان ڪاميابي سان خلا ۾ روانو ڪيو ويو آهي.
تفصيل موجب، سپارڪو جي چيئرمين محمد يوسف خان قوم کي مبارڪباد ڏيندي چيو ته حڪومتِ پاڪستان جي سهڪار سان هي قومي منصوبي حقيقت جو روپ ورتو آهي. HS-1 سيٽلائيٽ زمين، سبزياتي ماحول، پاڻي ۽ شهري علائقن جو تفصيلي تجزيو ڪرڻ جي صلاحيت رکي ٿو، جيڪو سوين نوري بينڊز ذريعي انتهائي درست تصويرون مهيا ڪندو.
هن سيٽلائيٽ ذريعي زرعي منصوبابندي، ماحولياتي نگراني، فصلن، مٽي ۽ پاڻي جي معيار جي سڃاڻپ، جنگلات جي ڪٽائي، آلودگي ۽ گليشيئرز جي پگھلڻ جي مانيٽرنگ ممڪن بڻجي سگهندي. ان سان گڏوگڏ، سي پيڪ منصوبن ۾ جغرافيائي خطرن جي نشاندهي ۾ به HS-1 اهم ڪردار ادا ڪندو.
سپارڪو چيئرمين وڌيڪ چيو ته هي سيٽلائيٽ پاڪستان جي خلائي پروگرام ۾ هڪ وڏي اڳڀرائي آهي، جيڪا ملڪ کي پائيدار ترقي لاءِ ابھرتي خلائي قومن جي صف ۾ شامل ڪندي. هن ٻڌايو ته HS-1 سيٽلائيٽ اڄ ئي پنهنجي مخصوص مدار ۾ داخل ٿي ويندو، جڏهن ته مدار ۾ مڪمل ٽيسٽنگ لاءِ ٻه مهينا لڳي سگهن ٿا، جنهن کان پوءِ سيٽلائيٽ مڪمل طور تي فعال ٿي ويندو.
ياد رهي ته هي سال پاڪستان پاران خلا ۾ موڪليل ٽيون سيٽلائيٽ آهي، جيڪو پاڪستان ۽ چين جي خلائي تعاون جي نئين باب جي شروعات پڻ آهي.
