لاهور، راولپنڊي، پشاور، ڪوئٽه (ويب ڊيسڪ) ملڪ جي مختلف شهرن ۾ ٽماٽن جي اگهن ۾ غير معمولي واڌ سبب عوام سخت پريشان ٿي ويو آهي. اڳ ئي مهانگائي جي مار سان ستايل ماڻهن لاءِ هاڻ ٽماٽن جي قيمتن ۾ واڌ هڪ نئين آزمائش بڻجي وئي آهي.
صوبائي گاڌي واري هنڌ لاهور جي منڊين ۾ ٽماٽن جي قيمت في ڪلو 500 رپيا تائين پهچي وئي آهي. واپارين جو چوڻ آهي ته منڊي ۾ سپلاءِ گهٽ هجڻ سبب اگهه تيزي سان وڌي رهيا آهن. شهر جي مختلف منڊين ۾ ٽماٽن جي فراهمي لڳ ڀڳ 50 سيڪڙو متاثر ٿي آهي، جنهن سبب قيمتن ۾ واڌ جو سلسلو جاري آهي.
راولپنڊي ۾ به صورتحال ساڳي آهي، جتي ٽماٽا سرڪاري ريٽ کان ٻه ڀيرا وڌيڪ اگهه تي وڪرو ٿي رهيا آهن. سرڪاري نرخنامي موجب ٽماٽن جي قيمت 130 کان 175 رپيا في ڪلو مقرر آهي، جڏهن ته مارڪيٽ ۾ اهي 450 رپيا في ڪلو تائين وڪرو ٿي رهيا آهن. دڪاندارن جو چوڻ آهي ته منڊي مان ئي ٽماٽا مهانگا ملي رهيا آهن، سرڪاري ريٽ تي وڪرو ڪرڻ ممڪن ناهي.
پشاور ۾ به ٽماٽن جي قيمتن ۾ تيزي سان واڌ ٿي آهي. سرڪاري ريٽ 330 رپيا في ڪلو مقرر آهي، پر مارڪيٽ ۾ اهي 400 کان 450 رپيا في ڪلو تائين وڪرو ٿي رهيا آهن. شهرين جو چوڻ آهي ته مهانگائي جي ڪري روزمره جي ضرورتن کي پورو ڪرڻ ڏکيو ٿي ويو آهي.
ڪوئٽه ۾ اڳي 50 کان 80 رپيا في ڪلو وڪرو ٿيندڙ ٽماٽن جي قيمت هاڻ 350 رپيا تائين پهچي وئي آهي. شهر جي مختلف علائقن ۾ ٽماٽا 250 کان 350 رپيا في ڪلو تائين وڪرو ٿي رهيا آهن. شهرين جو چوڻ آهي ته مهانگائي اڳ ئي زندگي مشڪل بڻائي ڇڏي آهي، هاڻ ٽماٽن جي اگهن ۾ واڌ رهي سهي ڪسر به پوري ڪري ڇڏي آهي.
عوام حڪومت کان مطالبو ڪري رهيو آهي ته فوري طور تي ٽماٽن جي اگهن تي ضابطو آڻڻ لاءِ قدم کنيا وڃن، جيئن عام ماڻهو جي زندگي ۾ ڪجهه آساني اچي. واپارين جو چوڻ آهي ته جيڪڏهن منڊي مان سستو مال ملي ته ئي سستو وڪرو ڪري سگهجي ٿو، ٻي صورت ۾ اگهن تي ضابطو آڻڻ ڏکيو آهي.
