راولپنڊي (ويب ڊيسڪ): آرمي چيف فيلڊ مارشل سيد عاصم منير چيو آهي ته بلوچستان پاڪستان جو فخر آهي ۽ صوبي جي ترقي لاءِ سياسي مفادن کان مٿانهون ٿي ڪم ڪرڻ لازمي آهي.
آءِ ايس پي آر موجب، فيلڊ مارشل جنرل هيڊڪوارٽرز (جي ايڇ ڪيو) ۾ 17هين نيشنل ورڪشاپ بلوچستان جي شرڪت ڪندڙن سان ملاقات دوران خطاب ڪيو. هن چيو ته بلوچستان جا ماڻهو انتهائي محب وطن، باصلاحيت ۽ حوصلي وارا آهن، جيڪي صوبي جو اصل اثاثو آهن.
هن وفاقي ۽ صوبائي حڪومتن جي ترقياتي منصوبن جو ذڪر ڪندي چيو ته اهي قدم بلوچستان جي سماجي ۽ معاشي ڍانچي کي بهتر بڻائڻ لاءِ عوامي فلاح کي نظر ۾ رکندي کنيا ويا آهن.
فيلڊ مارشل نوجوانن جي بااختياري ۽ سول سوسائٽي جي تعميري ڪردار کي پائيدار ترقي لاءِ اهم قرار ڏيندي چيو ته صوبي جي بي پناهه معاشي صلاحيت کي عوام جي بهتري لاءِ بروءِ ڪار آڻڻ گهرجي. هن خبردار ڪيو ته ڀارت جي سرپرستي هيٺ هلندڙ پراڪسيز، فتنہ الہند ۽ فتنہ الخوارج عوام دشمن ايجنڊا کي هٿي ڏئي رهيا آهن، جن جو مقصد تشدد کي هوا ڏيڻ ۽ ترقي کي روڪڻ آهي.
آءِ ايس پي آر موجب، آرمي چيف يقين ڏياريو ته دہشتگرد عنصرن جي مڪمل خاتمي لاءِ سڀ ضروري قدم کنيا پيا وڃن ته جيئن بلوچستان کي هن لعنت کان ڇوٽڪارو ملي. هن اهو عزم ورجايو ته پاڪستان خطي ۾ امن جو خواهشمند آهي، پر سرحدي سالميت جي ڀڃڪڙي جو فيصلائتو جواب ڏنو ويندو ته جيئن شهرين جي جان ۽ مال جو تحفظ يقيني بڻائي سگهجي. ورڪشاپ جي پڄاڻي تي سوال جواب جو سيشن پڻ ٿيو.
