ڪراچي (ويب ڊيسڪ) محڪمه موسميات ڪراچي طرفان ڏکڻ اوڀر بحيره عرب تي موجود هوا جي دٻاءُ بابت ٻيو ٽروپيڪل سائيڪلون واچ جاري ڪيو ويو آهي. رپورٽ موجب، گذريل 24 ڪلاڪن دوران هي دٻاءُ آهستي آهستي اتر ۽ اتر اوڀر طرف منتقل ٿيو آهي.
هي دٻاءُ ڪراچي جي ڏکڻ اوڀر ۾ لڳ ڀڳ 1690 ڪلوميٽر جي مفاصلي تي موجود آهي، جڏهن ته ڀارت جي لکشديپ علائقي جي اولهه ۽ ڏکڻ اولهه ۾ 570 ڪلوميٽر پري آهي.
محڪمه موسميات جو چوڻ آهي ته ايندڙ 24 ڪلاڪن دوران هي دٻاءُ اتر اوڀر طرف وڌڻ جو امڪان آهي، ۽ هن وقت پاڪستان جي ڪنهن به سامونڊي علائقي کي ڪو خطرو ناهي.
سائيڪلون وارننگ سينٽر ڪراچي طرفان سسٽم جي مسلسل نگراني جاري آهي ته جيئن ڪنهن به ممڪن خطري جي اڳواٽ اطلاع ڏئي سگهجي.
