راولپنڊي (ويب ڊيسڪ) راولپنڊي جي ڪرڪيٽ ميدان تي ٿيل ٻئي ٽيسٽ ميچ ۾ ڏکڻ آفريڪا پاڪستان کي شڪست ڏئي 2 ميچن واري سيريز 1-1 سان برابر ڪري ڇڏي. ڏکڻ آفريڪا 2007 کانپوءِ پهريون ڀيرو پاڪستاني زمين تي ٽيسٽ ميچ کٽي آهي.
ڏکڻ آفريڪا 68 رنسن جو هدف آساني سان 2 وڪيٽن جي نقصان تي حاصل ڪري ورتو. ڪپتان ايڊن مارڪرم 42 رنسن تي آئوٽ ٿيو، جڏهن ته ٽرسٽن اسٽبس بنا رن جي پويلين موٽيو. رائن ريڪلٽن 25 رنسن سان ناٽ آئوٽ رهيو. پاڪستان طرفان نعمان علي 2 وڪيٽون ورتيون.
ان کان اڳ پاڪستان جي ٻي اننگز سخت ناڪام رهي. چوٿين ڏينهن پاڪستان 94 رنسن تي 4 وڪيٽن جي نقصان سان اننگز جي شروعات ڪئي، جتي بابر اعظم (50) صرف هڪ رن جو اضافو ڪري پهرين اوور ۾ آئوٽ ٿي ويو. محمد رضوان 18 رنسن تي، نعمان علي ۽ شاهين آفريدي بنا رن جي آئوٽ ٿيا. سلمان آغا 28 ۽ ساجد خان 13 رنسن تي آئوٽ ٿيا.
ٻي اننگز جي شروعات پاڪستان 71 رنسن جي خساري سان ڪئي، جتي صرف 16 رنسن تي امام الحق (9)، عبدالله شفيق (6) ۽ شان مسعود بنا رن جي پويلين موٽي ويا. بابر اعظم ۽ سعود شڪيل وچ ۾ 44 رنسن جي ڀائيواري سان ٿوري سنڀال آئي، پر سعود شڪيل 11 رنسن تي آئوٽ ٿي ويو.
پوري پاڪستاني ٽيم ٻي اننگز ۾ صرف 138 رنسن تي ڍير ٿي وئي، جنهن بعد ڏکڻ آفريڪا کي 68 رنسن جو هدف مليو. ڏکڻ آفريڪا طرفان سائمن هارمر 6، ڪيشو مهاراج 2 ۽ ڪگيٽو ربادا 1 وڪيٽ ورتي.
ياد رهي ته پاڪستان ٽاس کٽي پهرين بيٽنگ ڪندي 333 رنسن ٺاهيا هئا. شان مسعود 87، سعود شڪيل 66، عبدالله شفيق 57، سلمان آغا 45، محمد رضوان 19، امام الحق 17 ۽ بابر اعظم 16 رنسن تي آئوٽ ٿيا. ڏکڻ آفريڪا طرفان ڪيشو مهاراج 7، سائمن هارمر 2 ۽ ربادا 1 وڪيٽ ورتي.
ڏکڻ آفريڪا پنهنجي پهرين اننگز ۾ 404 رنسن ٺاهي 71 رنسن جي برتري حاصل ڪئي. 235 رنسن تي 8 وڪيٽون وڃائڻ بعد متھوسامي ڪيشو مهاراج (30) سان 71 ۽ ربادا (71) سان 98 رنسن جي ڀائيواري قائم ڪري ٽيم کي فائدو ڏنو. متھوسامي 89 رنسن تي ناٽ آئوٽ رهيو، جڏهن ته اسٽبس 76 ۽ ربادا 71 رنسن تي نمايان رهيا.
پاڪستان طرفان آصف آفريدي 6، نعمان علي 2، شاهين آفريدي ۽ ساجد خان هڪ هڪ وڪيٽ ورتي. آصف آفريدي پنهنجي شروعاتي ميچ تي پنج وڪيٽون وٺي پاڪستان لاءِ ٻيو کاٻي هٿ وارو اسپنر بڻجي ويو، جيڪو ڊيبيو تي اهڙو ڪارنامو سرانجام ڏنو.
