ڪوئيٽه (ويب ڊيسڪ): بلوچستان جي ضلعي خضدار جي نال واري علائقي ڪليڙي ۾ نامعلوم هٿياربندن پاران تعميراتي ڪمپني جي ڪيمپ تي حملو ڪيو ويو، جنهن دوران 18 مزدورن کي اغوا ڪيو ويو ۽ ڪيترين ئي گاڏين ۽ مشينري کي باهه ڏئي ساڙي ڇڏيو.
اهو واقعو جمعي جي رات پيش آيو، جتي درجنين هٿياربندن پهرين شاهراهه کي بلاڪ ڪري ٽريفڪ بند ڪئي، پوءِ هڪ نجي تعميراتي ڪمپني جي ڪيمپ ۽ ڪرش پلانٽ تي حملو ڪري تباهي مچائي. متاثر ڪمپني خضدار کي واشڪ ضلعي جي بسيمه علائقي سان ڳنڍيندڙ اهم روڊ جي تعمير تي ڪم ڪري رهي هئي، جيڪو صوبائي ترقياتي منصوبن جو حصو آهي.
علائقي جي ليويز انچارج موجب، حملي دوران گهٽ ۾ گهٽ 8 گاڏين کي نقصان پهتو، جن ۾ ڳري مشينري ۽ ٽرانسپورٽ گاڏيون شامل آهن. حملي کان پوءِ هٿياربند مزدورن کي زبردستي ساڻ وٺي فرار ٿي ويا. اغوا ٿيل مزدورن مان اڪثر جو تعلق سنڌ سان آهي، جيڪي روزگار جي تلاش ۾ بلوچستان آيا هئا.
تعميراتي ڪمپني “ڊي بلوج” جي مئنيجر ذوالفقار احمد تصديق ڪئي ته شروعاتي طور تي 20 مزدورن کي اغوا ڪيو ويو، جن مان 2 کي بعد ۾ آزاد ڪيو ويو، جڏهن ته باقي 18 مزدور اڃا تائين گم آهن. هن چيو ته حملو ڪمپني جي ڪم تي گهڻو اثر ڇڏيندو ۽ ملازمن ۾ خوف وڌي ويو آهي.
واقعي جي اطلاع ملندي ئي ليويز، فرنٽيئر ڪور (ايف سي) ۽ ڪائونٽر ٽيررازم ڊپارٽمينٽ (سي ٽي ڊي) جي اهلڪارن علائقي ۾ پهچي سرچ آپريشن شروع ڪيو. مقامي قبائلي اڳواڻن جي مدد سان اغوا ٿيل مزدورن جي ڳولا جاري آهي، پر اڃا تائين ڪو به ڏس پتو نه ملي سگهيو آهي.
واضح رهي ته هي واقعو هڪ هفتي اندر مزدورن جي اغوا جو ٻيو وڏو سانحو آهي. ان کان اڳ مستونگ جي دشت علائقي مان 9 مزدورن کي اغوا ڪيو ويو هو، جن جو به ڪو پتو نه پيو. هاڻي اغوا ٿيل مزدورن جو انگ 27 ٿي چڪو آهي.
ان قسم جي واقعن سبب صوبائي سطح تي ڪم ڪندڙ هزارين مزدورن ۽ تعميراتي ڪمپنين ۾ ڳڻتي وڌي وئي آهي. حڪومت بلوچستان ان واقعي جي مذمت ڪندي خاطري ڪرائي آهي ته جوابدارن کي جلد گرفتار ڪري انصاف فراهم ڪيو ويندو. مقامي ماڻهن جو چوڻ آهي ته اهڙا حملا صوبائي ترقي کي نقصان پهچائڻ جي ڪوشش آهن، جن کي روڪڻ لاءِ جامع حڪمت عملي جي ضرورت آهي.
