اسلام آباد (نمائندن وٽان) اڄ مقبوضه جمون ۽ ڪشمير تي هندستاني قبضي جا 77 سال مڪمل ٿيڻ تي پاڪستان، آزاد ڪشمير، گلگت بلتستان سميت سڄي دنيا ۾ يومِ سياه انتهائي جذباتي ۽ جوش سان ملهايو پيو وڃي، جتي ڪشميرين جي قربانين کي ڀيٽا پيش ڪئي پئي وڃي ۽ ڀارتي ظلمن کي عالمي برادري آڏو بي نقاب ڪيو پيو وڃي.
صبح 10 وڳي، ڪشمير جي شهيدن جي ياد ۾ هڪ منٽ جي خاموشي اختيار ڪئي وئي، جيڪا سندن قربانين جي عظمت جو اعتراف هئي.
احتجاجي ريليون ۽ واڪس:
اسلام آباد ۾ پرڏيھي کاتي کان ڊي چوک تائين مرڪزي ريلي ڪڍي وئي، جتي هزارين شهرين، شاگردن، سرڪاري عملدارن ۽ سول سوسائٽي جي نمائندن شرڪت ڪئي.
“ڪشمير بڻجندو پاڪستان” جا بينر ۽ پوسٽرز شاهراهِ دستور، پارليامينٽ هائوس ۽ ڊي چوڪ تي لڳايا ويا، جيڪي آزادي جي جذبي جي ترجماني ڪري رهيا هئا.
سڄي ملڪ جيان لاڙڪاڻي شهر ۾ به 27 آڪٽوبر يوم استحصال ڪشمير ملهائڻ جي سلسلي ۾ گورنمينٽ بوائز ڊگري ڪاليج لاڙڪاڻي ۾ تقريب منعقد ڪئي وئي جنهن ۾ قومي جھنڊو ڦڙڪائي قومي ترانو پيش ڪيو ويو. تقريب کي خطاب ڪندي ڪمشنر لاڙڪاڻو ڊويزن طاهر حسين سانگي ۽ ڊپٽي ڪمشنر لاڙڪاڻو ڊاڪٽر شرجيل نور چنا چيو ته 27 آڪٽوبر جو ڏينهن ڪشميري عوام لاءِ هڪ اونداهي ڏينهن طور ياد ڪيو وڃي ٿو، جڏهن ته ڀارت غيرقانوني طور تي والاريل ڪشمير تي قبضو ڪيو.
اسان اڄ به ڪشميري عوام سان مڪمل طور تي يڪجهتي جو اظهار ڪريون ٿا ۽ انهن جي جدوجهدِ آزادي جي حمايت جاري رکنداسين. هنن وڌيڪ چيو ته سنڌ حڪومت ۽ پاڪستان جو هر شهري ڪشمير جي مظلوم عوام سان گڏ آهي. ڪشمير پاڪستان جي شھ رڳ آهي ۽ اسان انهن جي حقِ خود اراديت جي جدوجهد ۾ هر ممڪن اخلاقي، سياسي ۽ سفارتي مدد جاري رکنداسين.
ٻئي طرف ڪمشنر لاڙڪاڻو ڊويزن طاهر حسين سانگي، ڊپٽي ڪمشنر لاڙڪاڻو ڊاڪٽر شرجيل نور چنا، اسسٽنٽ ڪمشنر لاڙڪاڻو راجا دريا خان قريشي ۽ ٻين جي اڳواڻي ۾ ڪشميرين سان يڪجھتي طور ريلي جو اهتمام ڪيو ويو جيڪا گورنمينٽ بوائز ڊگري ڪاليج لاڙڪاڻو کان شروع ٿي سر شاهنواز ڀٽو ميموريل لائبريري تي اختتام پذير ٿي. ريليءَ ۾ پرنسيپل گورنمينٽ بوائز ڊگري ڪاليج لاڙڪاڻو عبدالوحيد چانڊيو، ڊسٽرڪٽ ايجوڪيشن آفيسر پرائمري لاڙڪاڻو انيس الرحمان جلباڻي، پرنسيپل گورنمينٽ پائليٽ هائير سيڪنڊري اسڪول لاڙڪاڻو، ڪاليج جي ليڪچرارن، پروفيسرن، مختلف کاتن جي آفيسرن ۽ شاگردن وڏي تعداد ۾ شرڪت ڪئي، ان دوران پاڪستان زنده باد، پاڪ فوج زنده باد ۽ ڪشميرين جي جدوجهد زنده باد جا نعرا پڻ لڳايا ويا.
عالمي سطح تي آواز:
ڪراچي، لاهور، پشاور، مظفرآباد ۽ گلگت سميت ملڪ جي ٻين وڏن شهرن ۾ به احتجاجي ريليون ۽ تصويري نمائشون منعقد ڪيون پيون وڃن.
تعليمي ادارن ۾ خاص تقريبون ٿيون، جتي شاگردن آزادي جي عزم کي ورجايو.
مقررن جو پيغام:
عالمي برادري کان مطالبو ڪيو ويو ته هو والاريل ڪشمير ۾ انساني حقن جي ڀڃڪڙين جو نوٽيس وٺي.
ڪشميرين کي سندن حقِ خوداراديت ڏيڻ لاءِ عملي قدم کنيا وڃن.
قوم جو عزم:
اڄ جو ڏينهن ڪشميرين سان ايمان، حوصلي ۽ يڪجهتي جي تجديد جو ڏينهن آهي. پاڪستاني قوم واضح پيغام ڏنو آهي ته ڪشميرين جي جدوجهدِ آزادي ۾ هو سندن ساٿ نڀائيندا رهندا.
جيئن ته ظلم جي رات ڊگهي آهي، پر آزادي جو سج ضرور اُڀرندو.
