جيڪب آباد (رپورٽ: خيرمحمد دايو) ضلعي جيڪب آباد ۽ ان جي آس پاس وارن علائقن جي هارين پاران سارين جي فصل جا مناسب اگهه نه ملڻ خلاف سخت احتجاجي ريلي ڪڍي وئي، جيڪا شهيد الله بخش سومرو پارڪ کان شروع ٿي جيڪب آباد پريس ڪلب آڏو ڌرڻي ۾ تبديل ٿي وئي.
احتجاج جي اڳواڻي محمد حنيف جکراڻي ۽ سيد عبدالرزاق شاهه ڪئي، جتي هارين، آبادگارن ۽ زميندارن وڏي انگ ۾ شرڪت ڪئي. مظاهرين هٿن ۾ بينر ۽ پلي ڪارڊ کڻي حڪومت ۽ چونڊيل نمائندن خلاف نعريبازي ڪئي.
مظاهرين جو چوڻ هو ته:
“سڄو سال محنت ڪري ڀاڻ، ٻج، پاڻي، مزدوري سميت لکين رپيا خرچ ڪري فصل پوکيون ٿا، پر فصل پچڻ بعد مارڪيٽ ۾ مناسب اگهه نه ملڻ ڪري سخت نقصان کڻڻو پوي ٿو.”
هنن چيو ته موجوده حالتن ۾ سارين جو في مڻ اگهه پيداوار جي لاڳت کان به گهٽ آهي، جيڪو سندن معاشي قتل برابر آهي. هارين جو چوڻ هو ته هو بينڪن کان قرض وٺي فصل پوکين ٿا، پر هاڻ ڀاڻ، دوا، پاڻيءَ جي کوٽ ۽ مارڪيٽ ۾ سيٺن جي من ماني اگهن سبب ڏيوالي جي ڪناري تي اچي ويا آهن.
احتجاجي اڳواڻن جا مطالبا:
- سارين جي في مڻ اگهه جو تعين ڪري مناسب سرڪاري اگهه مقرر ڪيو وڃي
- سرڪاري خريداري جو نظام بحال ڪيو وڃي
- هارين لاءِ زرعي سبسڊي جو بندوبست ڪيو وڃي
- مارڪيٽ ڪميٽي تي ڪنٽرول ڪري واپارين جي من ماني بند ڪئي وڃي
- زرعي قرضن تي وياج معاف ڪري آسان قسطن تي نئون قرض ڏنو وڃي
احتجاج ڪندڙن سنڌ حڪومت، ايم اين ايز ۽ ايم پي ايز کان مطالبو ڪيو ته هو هارين جي حالتن جو نوٽيس وٺن ۽ سندن معاشي تحفظ لاءِ فوري قدم کنيا وڃن.
