ڪراچي (ويب ڊيسڪ) پاڪستان جي توانائي شعبي ۾ اڄ هڪ تاريخي اڳڀرائي ٿي آهي، جتي آمريڪا مان آيل سڀ کان وڏو خام تيل کڻندڙ جهاز ايم ٽي پيگاسس ڪراچي جي سامونڊي حدن ۾ پهچي ويو آهي. هي جهاز سنرجيڪو (Cnergyico) آئل ڪمپني جي ٽرمينل تي برٿ ٿيندو، جيڪو پاڪستان جي بندرگاهن تي پهچندڙ سڀ کان وڏو آمريڪي تيل بردار جهاز قرار ڏنو پيو وڃي.
سنرجيڪو ڪمپني طرفان آمريڪا مان پهريون ڀيرو 10 لک بيرل ويسٽ ٽيڪساس انٽرميڊيئيٽ (WTI) خام تيل درآمد ڪيو ويو آهي، جيڪو پاڪستان ۽ آمريڪا جي وچ ۾ واپاري معاهدي کانپوءِ خام تيل جي درآمد جي شروعات آهي.
ڪمپني موجب، هي جهاز 14 سيپٽمبر تي هيئوسٽن مان روانو ٿيو هو ۽ اڄ سنرجيڪو جي SPM آئل ٽرمينل تي لنگر انداز ٿيندو. هي جهاز بلوچستان جي سامونڊي علائقي ۾ آف شور ٽرمينل تي برٿ ٿيندو.
سنرجيڪو اڳ به مالي سال 2017 ۾ ملڪ جي تاريخ جو سڀ کان وڏو خام تيل کڻندڙ جهاز پنهنجي ٽرمينل تي آڻي رڪارڊ قائم ڪيو هو. هاڻ ڪمپني نومبر جي وچ ڌاري ٻيو آئل ڪارگو ۽ سال 2026 ۾ ٽيون ڪارگو آڻڻ جو منصوبو رکي ٿي.
هن پيش رفت سان سنرجيڪو آمريڪي خام تيل درآمد ڪندڙ پاڪستان جي پهرين ڪمپني بڻجي وئي آهي، جنهن سان ٻنهي ملڪن جي واپاري لاڳاپن ۾ نئون دور شروع ٿي ويو آهي. توانائي شعبي جي ماهرن ان کي پاڪستان لاءِ هڪ اهم اقتصادي سنگ ميل قرار ڏنو آهي.
