واشنگٽن(ويب ڊيسڪ) آمريڪي صدر ڊونلڊ ٽرمپ چيني صدر شي جن پنگ سان ملاقات کانپوءِ چين تي لاڳو واپاري ٽيرف ۾ 10 سيڪڙو گهٽتائي جو اعلان ڪيو آهي، جنهن سان ٽيرف 57 سيڪڙو مان گهٽجي 47 سيڪڙو ٿي ويو، جيڪو فوري طور تي لاڳو ٿيندو.
صدر ٽرمپ هن ملاقات کي ”انتهائي مثبت” قرار ڏيندي چيو ته آمريڪا ۽ چين جي وچ ۾ ڪيترن ئي اهم معاملن تي اتفاق ٿي چڪو آهي. ٻنهي ملڪن سويابين جي خريداري ٻيهر شروع ڪرڻ ۽ ناياب معدني وسيلن جي واپار ۾ رڪاوٽن ختم ڪرڻ تي به اتفاق ڪيو آهي.
صدر ٽرمپ اعلان ڪيو ته هو ايندڙ سال اپريل ۾ چين جو دورو ڪندا، جنهن کانپوءِ صدر شي جن پنگ آمريڪا جو دورو ڪندا. هن وڌيڪ چيو ته آمريڪا ۽ چين گڏجي يوڪرين جي معاملي تي تعاون جاري رکندا، جڏهن ته تائيوان بابت ڪا ڳالهه نه ٿي.
ان سان گڏ، ٽرمپ اهو به اشارو ڏنو ته جهڙوڪ ٻين ملڪن، آمريڪا لاءِ به نيوڪليئر هٿيارن جا تجربا ٻيهر شروع ڪرڻ مناسب هوندو، پر ٽيسٽنگ سائيٽن بابت حتمي فيصلو بعد ۾ ڪيو ويندو.
هن واپاري نرمي ۽ سفارتي رابطن جي واڌاري کي عالمي سطح تي ٻن وڏين معيشيتن جي وچ ۾ اعتماد جي بحالي طور ڏٺو پيو وڃي، جيڪو مستقبل جي لاڳاپن لاءِ اهم قدم ثابت ٿي سگهي ٿو.
