لاهور(ويب ڊيسڪ) لاهور هڪ ڀيرو ٻيهر دنيا جي آلودگيءَ ۾ سڀ کان مٿي شهرن ۾ شامل ٿي ويو آهي، جتي ايئر ڪوالٽي انڊيڪس (AQI) جي سطح خطرناڪ حد 985 تائين رڪارڊ ڪئي وئي. عالمي ماحولياتي اداري آئي ڪيو ايئر موجب، شهر جو مجموعي AQI 598 رڪارڊ ٿيو، جڏهن ته نئين دهلي 475 پوائنٽن سان ٻئي نمبر تي رهيو.
پنجاب ايئر ڪوالٽي انڊيڪس مطابق، گوجرانوالا، شيخوپورا، قصور، فيصل آباد، سرگودها، ڊي جي خان، ملتان، بهاولپور، راولپنڊي ۽ سيالڪوٽ سميت ڪيترن ئي شهرن ۾ فضا مضر صحت سطح تي رڪارڊ ڪئي وئي. علامه اقبال ٽائون، صدر ڪينٽ، FF پاڪستان، راوي ڪيمپ ۽ سفاري پارڪ جهڙن علائقن ۾ آلودگيءَ جي سطح انتهائي خطرناڪ حدن تائين پهتي.
وزيراعليٰ پنجاب مريم نواز تعميراتي ماڳن، سڙڪن ۽ غير قانوني سرگرمين جي خلاف سخت قدم کڻڻ جو اعلان ڪندي، ضلعي انتظاميا، پوليس ۽ زراعت کاتي کي رات جي نگراني سخت ڪرڻ جي هدايت ڪئي. اي پي اي طرفان هڊيارا ڊرين تي قائم غير قانوني ڀٽو مسمار ڪيو ويو، جڏهن ته 412 ٽن غير معياري پلاسٽڪ ضبط ڪري ري سائيڪلنگ لاءِ موڪليو ويو.
محڪمه موسميات موجب، ڀارت جي هريانا، پنجاب ۽ هماچل مان آلوده هوائون لاهور ۽ وچ پنجاب ۾ داخل ٿي رهيون آهن، جڏهن ته هوا جي رفتار گهٽ هجڻ سبب آلودگيءَ جا ذرات زمين جي ويجهو جمع ٿي رهيا آهن. فصلن جي باقيات ساڙڻ سبب صورتحال وڌيڪ خراب ٿي رهي آهي.
ماحوليات جي تحفظ واري کاتي شهرين کي صلاح ڏني آهي ته هو ٻنپهرن 12 کان 3 وڳي ۽ رات 7 وڳي کان پوءِ غير ضروري طور تي گهر کان ٻاهر نه نڪرن. خاص طور تي ٻارن، پوڙهن ۽ ساهه يا دل جي مريضن لاءِ احتياطي تدبيرون اختيار ڪرڻ جي هدايت ڪئي وئي آهي.
سينيئر صوبائي وزير مريم اورنگزيب موجب، پنجاب ماحول دوست پاليسين ڏانهن تبديليءَ جي مرحلي مان گذري رهيو آهي، جتي تعميراتي سرگرمين، گاڏين جي ڌوئي ۽ پلاسٽڪ جي استعمال تي زيرو ٽالرنس پاليسي لاڳو ڪئي وئي آهي. ضلعي سطح تي ايمرجنسي ٽيمون روزاني انسپيڪشن ۽ رپورٽنگ جي عمل ۾ مصروف آهن.
ماهرن خبردار ڪيو آهي ته جيڪڏهن موجوده موسمي حالتون برقرار رهيون ته لاهور ۽ وچ پنجاب جا ڪيترائي علائقا ايندڙ ڏينهن ۾ به خطرناڪ سطح جي آلودگيءَ جي لپيٽ ۾ رهندا.
