راولپنڊي (ويب ڊيسڪ) راولپنڊيءَ جي علائقي صادق آباد ۾ سينيئر صحافي طاهر نصير کي ٽارگيٽ ڪلنگ جو نشانو بڻائڻ جي ڪوشش ناڪام بڻائي وئي، جڏهن پوليس ٽي ڀاڙي جي قاتلن کي گاڏي ۽ هٿيارن سميت گرفتار ڪري ورتو.
پوليس موجب، گرفتار ٿيل جوابدارن احمد، آڪاش ۽ وشال، صحافي کي قتل ڪرڻ لاءِ محسن شاهه، اختر سندهو، قاسم سندهو ۽ سڪندر سندهو کان 2 لک رپيا سپاري طور ورتا هئا. انهن مان احمد ۽ آڪاش کي قتل جي ذميواري ڏني وئي هئي، جڏهن ته وشال هٿيار فراهم ڪيا هئا.
جوابدارن ٽن ڏينهن تائين صحافي جي گهر جي ريڪي ڪندا رهيا ۽ 99 هزار رپيا اڳواٽ پنهنجي اڪائونٽ ۾ گهرايا. پوليس سندن حرڪتن تي نظر رکي، ۽ آخرڪار صحافي جي گهر جي ويجهو ڪارروائي ڪندي گاڏي ۽ هٿيارن سميت گرفتار ڪري ورتو.
گرفتار ٿيلن کي علائقي مجسٽريٽ جي عدالت ۾ پيش ڪيو ويو، جتي عدالت جسماني ريمانڊ جي استدعا رد ڪندي، ٽنهي جوابدارن کي جوڊيشل ريمانڊ تي جيل موڪلي ڇڏيو.
پوليس جو چوڻ آهي ته معاملي جي وڌيڪ جاچ جاري آهي، ۽ جلد ئي سازش ڪندڙن خلاف به قانوني ڪارروائي ڪئي ويندي. صحافتي حلقن پاران واقعي تي ڳڻتي جو اظهار ڪندي، صحافين جي تحفظ لاءِ سخت قدم کڻڻ جو مطالبو ڪيو ويو آهي.
