اسلام آباد(ويب ڊيسڪ) سُڌ سماءَ واري وفاقي وزير عطاءَ تارڙ انڪشاف ڪيو آهي ته ڀارتي خفيه ايجنسي هڪ پاڪستاني مهاڻي اعجاز ملاح کي پئسن جي لالچ ڏئي پنهنجي لاءِ ڪم ڪرڻ تي راضي ڪيو. اهو انڪشاف اسلام آباد ۾ گهرو کاتي جي مملڪتي وزير طلال چوڌري سان گڏ ٿيل گڏيل پريس ڪانفرنس دوران ڪيو ويو۔
عطا تارڙ موجب، ڀارت پاران شروع ڪيل “آپريشن سندور” جي ناڪامي کانپوءِ ڀارتي ميڊيا ۽ انٽيليجنس ادارن پاران مس انفارميشن ۽ ڊس انفارميشن مهم هلائي وئي. ان مهم جي حصي طور، ڀارتي ڪوسٽ گارڊ سيپٽمبر ۾ اعجاز ملاح کي گرفتار ڪيو ۽ کيس پاڪستاني فوج، رينجرز ۽ نيوي جي ورديون، زونگ سمون، پاڪستاني ڪرنسي ۽ سگريٽ وٺي اچڻ جو ٽاسڪ ڏنو ويو۔
اعجاز ملاح جي گرفتاري کانپوءِ، هن پنهنجي اعترافي بيان ۾ ٻڌايو ته کيس ڀارتي خفيه ايجنسي جي آفيسر جون تصويرون موڪلڻ لاءِ چيو ويو، ۽ جڏهن هو ٻيهر سامونڊي حدن ۾ ويو ته پاڪستاني ايجنسين کيس گرفتار ڪيو۔
طلال چوڌري موجب، اعجاز ملاح کي 95 هزار رپيا ڏيڻ جا ثبوت موجود آهن، ۽ ڀارتي پروپيگنڊا آپريشن مڪمل طور تي بي نقاب ٿي چڪو آهي. هن چيو ته پاڪستاني ميڊيا معلوماتي جنگ ۾ ڪاميابي حاصل ڪئي ۽ ڀارت کي خبردار ڪيو ته پاڪستان جا ادارا مڪمل طور تي چاڪچوبند آهن.
پريس ڪانفرنس دوران اعجاز ملاح جو اعترافي وڊيو بيان به ڏيکاريو ويو، جڏهن ته ڪجهه آڊيوز به جلد ميڊيا سان شيئر ڪرڻ جو اعلان ڪيو ويو.
