اسلام آباد: اين سي سي آءِ اي جي اهلڪارن خلاف ڪرپشن جا ڪيس سامهون اچڻ کانپوءِ نئين ڊائريڪٽر جنرل پاران اهم فيصلو ڪيو ويو آهي، جنهن تحت ادارا جي اندروني ڪارروائين جو جامع جائزو وٺڻ جو عمل شروع ڪيو ويو آهي۔
ذريعن موجب، ڊي جي اين سي سي آءِ اي طرفان سڀني درج ٿيل ايف آءِ آرز ۽ انڪوائريز جو رڪارڊ طلب ڪيو ويو آهي، جڏهن ته سيل ڪيل جائيدادون، گاڏيون ۽ ٻين اثاثن جي تفصيلي رپورٽ پڻ تيار ڪرڻ جي هدايت ڏني وئي آهي۔
ان سلسلي ۾ اداري جي سڀني زونز کي هدايت ڪئي وئي آهي ته هو 3 نومبر تائين پنهنجن علائقن ۾ درج ٿيل ڪيسن ۽ ايف آءِ آرز جي مڪمل تفصيل جمع ڪرائين، ته جيئن اين سي سي آءِ اي جي ڪارڪردگي جو شفاف جائزو وٺي سگهجي۔
هي قدم اداري جي ساک بحال ڪرڻ ۽ احتساب جي عمل کي تيز ڪرڻ جي ڪوشش طور ڏٺو پيو وڃي، جتي ڪرپشن خلاف سخت قدم کڻڻ جو عزم ظاهر ڪيو ويو آهي۔
