پشاور – آچر ڏينهن پشاور جي ڪائونٽر ٽيررازم ڊپارٽمينٽ سي ٽي ڊي ٿاڻي تي ڌماڪي سبب هڪ پوليس اهلڪار شهيد ٿي ويو، جڏهن ته ٻه زخمي ٿيا. پوليس موجب، ڌماڪو ٿاڻي ۾ رکيل بارودي مواد ۾ شارٽ سرڪٽ سبب ٿيو، ۽ ڪنهن به حملي جي ڳالهه رد ڪئي وئي.
پشاور جي ڪيپيٽل سٽي پوليس آفيسر سي سي پي او ڊاڪٽر سعيد وضاحت ڪئي ته واقعي وقت عمارت ۾ ٽي سي ٽي ڊي اهلڪار موجود هئا، جن مان هڪ شهيد ۽ ٻه زخمي ٿيا. هن ٻڌايو ته لاڪ اپ ۾ رکيل چار جوابدارن کي محفوظ طريقي سان ٻاهر ڪڍيو ويو.
ڌماڪي سبب عمارت جو هڪ حصو متاثر ٿيو. واقعي جي جاچ لاءِ خاص سي ٽي ڊي ٽيم واقعي واري هنڌ پهچي وئي، جتي فورينسڪ ثبوت گڏ ڪيا ويا. ايس ايس پي سي ٽي ڊي جي اڳواڻيءَ ۾ ٽيم ابتدائي جاچ مڪمل ڪري ورتي آهي.
بم ڊسپوزل يونٽ بي ڊي يو ۽ سي ٽي ڊي جون ٽيمون ملبي مان مواد گڏ ڪرڻ ۾ مدد ڪري رهيون آهن، جڏهن ته ويجهن علائقن مان سي سي ٽي وي فوٽيج پڻ حاصل ڪئي پئي وڃي ته جيئن واقعي جي تسلسل کي سمجهي سگهجي. پوليس انهن اهلڪارن جا بيان پڻ رڪارڊ ڪري رهي آهي، جيڪي ڌماڪي وقت عمارت اندر موجود هئا.
