اسلام آباد (نمائندو خصوصي): پاڪستان موسميات کاتي موجب 4 نومبر کان اتر ۽ وچ پاڪستان ۾ برسات، تيز هوائون، گجگوڙ، ۽ جبلن تي برفباري جو امڪان آهي. مغربي هوا جو سلسلو 3 نومبر جي رات کان داخل ٿيندو، جيڪو 5 نومبر تائين جاري رهندو، جنهن سبب گرمي پد ۾ نمايان گهٽتائي ٿيندي.
چترال، دير، سوات، ڪوهستان، شانگلا، ملاکنڊ، ڪشمير ۽ گلگت-بلتستان سميت ڪيترن ئي علائقن ۾ برفباري ۽ طوفاني برسات متوقع آهي. اسلام آباد، راولپنڊي، مري، لاهور ۽ ويجهن علائقن ۾ اولن جو امڪان پڻ ظاهر ڪيو ويو آهي.
موسميات کاتي خبردار ڪيو آهي ته تيز هوائون ۽ اولن سبب ڪمزور اڏاوتن کي نقصان پهچي سگهي ٿو. پنجاب ۾ ڌنڌ ۽ ڌوڙ عارضي طور گهٽ ٿيندي، پر برسات کانپوءِ ٻيهر وڌڻ جو امڪان آهي.
زميندارن کي مشورو ڏنو ويو آهي ته هو پنهنجي زرعي سرگرمين کي موسم جي اڳڪٿي مطابق ترتيب ڏين، جڏهن ته جبلن ڏانهن سفر ڪندڙن کي احتياط ڪرڻ جي هدايت ڏني وئي آهي.
