ڪراچي (ويب ڊيسڪ) مشهور اداڪارا صبا قمر هڪ سينيئر صحافي طرفان لڳايل سنگين الزامن کي بي بنياد قرار ڏيندي، قانوني ڪارروائي جو اعلان ڪيو آهي.
صبا قمر هن وقت پنهنجي ٻن ڊرامن “پامال” ۽ “ڪيس نمبر 9” سبب ميڊيا جي توجهه جو مرڪز بڻيل آهي. تازو، ڪراچي بابت سندس بيان تي سوشل ميڊيا تي بحث هلندڙ هو، جنهن کانپوءِ هڪ صحافي پاران متنازع دعوائون ڪيون ويون، جن نئين بحث کي جنم ڏنو.
صحافي دعويٰ ڪئي ته صبا قمر 2003–2004 ۾ لاهور ۾ اهڙي گهر ۾ رهندي هئي، جيڪو مبينا طور تي ڪنهن “قريبي تعلق” رکندڙ شخص جو هو. هن اهو به چيو ته صبا هراسان ٿيڻ کانپوءِ هڪ خانگي نيوز آفيس ۾ شڪايت لاءِ آئي هئي، جتي سندن پهرين ملاقات ٿي.
صبا قمر انهن دعوائن کي سراسر ڪوڙ قرار ڏيندي چيو آهي ته هوءَ قانوني طريقي سان جواب ڏيندي. سوشل ميڊيا تي صارفين وڏي انگ ۾ صبا قمر جي فيصلي جي حمايت ڪئي آهي. هڪ صارف لکيو: “بهترين قدم، اهڙن ماڻهن کي عدالت ۾ جواب ڏيڻ گهرجي.”
